أشهر الحموات في السينما تنصح السيدات بالنظافة
![مارى منيب](images/no.jpg)
طوبة على طوبة تخلى العركة منصوبة، حماتك مدوباهم اثنين.. عبارات اشتهرت بها أشهر حماة فى السينما المصرية ماري منيب.
وماري منيب حبيب مواليد عام 1905 فى سوريا من أسرة لبنانية، انتقلت بعدها إلى القاهرة حيث عاشت فى شبرا وعملت بالمسرح والسينما واشتهرت ببراعتها فى تجسيد دور الحماة النكدية، ورغم ذلك لها مجموعة مقالات نشرتها الجيل عام 1956 تحمل جميعها وصايا لإعداد الزوجة الصالحة، ورحلت فى 21 يناير 1969، ففي إحدى مقالاتها قالت:
النظافة النظافة ياستات كسفتونا، النظافة هى سلوك بإيدك مش بإيد حد تانى، وأنت الوحيدة المتحكمة فيها، فالست هى اللى لازم تهتم بالنظافة وأول خطوات النظافة مكافحة الذباب، السبب الرئيسى فى جميع الأمراض المعدية والمستعصية، الذبابة تقف اسم الله على مقامكم على الحاجة الوحشة كلام فى سركم، وبعدين تيجى على حد تانى يا ساتر علشان كده لازم أموتها قبل ما تعمل كده.
إن كنت ست غنية وعندى خدم لازم أراعى بيتى بنظرى على كل صغيرة وكبيرة ، وأراعيه بإيدى إن كنت ست متوسطة الحال ، وبكده أضمن صحتى وصحة جوزى واولادى ، دى اهم حاجة ، والحاجة الثانية مجموعة وصايا لو قدرت اى ست تنفذهم تضمن انها تحافظ على بيتها .
اولا حطى على الشباك ستاير سلك بين الخشب والزجاج ومش حايكلفك اكثر من خمسين قرش.
ثانيا الزبالة موش لازم تتواجد فى البيت اطلاقا ، لازم يكون عندك زبالة بغطاء محكم سعرها موش حايزيد عن سبعين قرش .
ثالثا فيه حاجة اسمها فليت يطهر البيت من كل الحشرات وثمنها 18 قرشا.
رابعا علمى اولادك ما يرموش فضلات الاكل زى قشرالبرتقال والموز مثلا على الارض وييجى الذباب يتلم عليه ياساتر .
خامسا كل يوم تفتحى الشبابيك الصبح تهوى الحجرات واتركى بعدها جزء صغير من الشباك مفتوح وهشى الطير واطفى النور لانه بيكره الضلمة .
سادسا اذا كان عندك كلاب او قطط حميها باستمرر ونظفيها اول بأول مش تتركيها قذرة واولادك يلعبوا معاها .
131 عاما.. ذكرى ميلاد "كشكش بيه”
سابعا لا تتركى اللحوم والحلويات واطباق الطعام عموما مكشوفى بدل ماتبقى غذاءا للدبان وامراض لاهل بيتك .
ثامنا امنعى الاولاد تماما من شراء الجيلاتى او الدندورمة او اية ماكولات من الشارع لانها مليانة ميكروبات وجراثيم وامراض فتاكة .