ساخرون.. كابتن ماجد: طبيب النادي الأهلي

أنا مش عارف ليه الراجل الطبيب بتاع النادي الأهلي ده مالوش كلمة أبدا.. اللاعب يُصاب من هنا تلاقيه طالع لنا بتصريح إن الإصابة في الحتة الفلانية، وهتحتاج أسبوع علاج وأسبوع راحة.. وإذ فجأة نلاقى اللاعب اختفى عن الملاعب بالشهر والشهرين.. وأحيانا اللاعب بيرجع بعد يوم أو يومين طب هو العيب في الطبيب المعالج ولا العيب في اللعيبة ولا  فينا إحنا اللى بنصدق كلام الدكاترة بتوع العلاج الطبيعى؟!

يا راجل دى مستشفى النادي الأهلي مزحومة بالمصابين اكتر من مستشفى أم المصريين، لاعب طالع ولاعب داخل ونفس الإصابات بتتكرر كل مرة، حتى اللى بيسافر يتعالج في الخارج ويرجع سليم، تلاقى الطبيب بتاع الأهلي بيعمل حاجة كده إحنا مانعرفهاش تخلى اللاعب يتصاب تانى ويرجعله علشان يعالجه هو بنفسه في مدة يحددها هو.. وبرضه مش هتطلع صحيحة، فقد يعود اللاعب للعب بعدها بأسابيع، وقد يعود قبلها بأسابيع ودوخينى يا لمووووووووووووووووونة

أكثر من عشرة لاعبين الآن بالمستشفى قبل خروج العشرة الأولانيين اللى رجع منهم 3 قبل خروج 2 تانيين كانوا مصابين، أنا شايف إن إدارة الأهلي تكشف على الطبيب المعالج وجهازه المعاون أو تحجزهم في مستشفى النادي علشان يتعلموا الأدب. ده إحنا بقى عندنا منتخب مصابين يا راجل.