إيه يا ضرسي.. قصيدة لمحمد عمر
إيه يا ضرسى ؟
إيه يا ضرسى... ؟
إيه يا ضرسى...؟
جاى أهوه وعليك بمسّى.
قولّى إيه كان بس منى
لما تزعل وتخاصمنى
و ف يومين ألمك قاتلنى ؟
طب جاوبنى
قوللى..فيدنى
أعمل ايه لجل تصالحنى.
السوساية وشيلنهالك
طربوشاية وجبنهالك
قولى إيه تانى وصارحنى.
و السوساية... مش بيدّى
جَت في جسمك غصب عنى
كلت حلو كتير.. سامحنى.
دا إنت تبقى حتة منى
و ف مكانك زى ابنى
ليه مغلبنى وتاعبنى ؟
ياما روحنا كتير عزايم
ياما كلت معاك ولايم
عند حمدى وعند حسنى.
ياما قلت دا ضرس غول
عضم يطحن..لحمة فول
عمره ما همه...مساعدنى.
مش شايفها بردو عيب
لما بيقوللى الطبيب
إن ضرسك مش عاجبنى ؟
ليه تشمّت فينا شامت ؟
ليه تدخّل بينا تالت ؟
يوجعك ويقوم واجعنى ؟
بص لِخواتك وشوفهم
كلهم قاعدين في حالهم
مرتاحين ومريحينى.
دا اللى بهدلته وكسرته
اتحشى وخلصت حكايته
عمره ما زيك حاسبنى.
الحكاية فيها إنّة ؟
واقع إنت ف حب سِنّة؟
قلت جارها يروح ناقلنى ؟
طب هنعمل بس إيه؟
صعب دا اللى بتحكى فيه
مش هينفع... غصب عنى.
مش هنتكلم كتير
إنت بردو ليك ضمير
ونتَ بالتأكيد حاسسنى.
