حتى الغلابة فهموا الفولة

ندخل على جابر القرموطي بتاع on tv أنا خايفة الراجل يا عيني يطق له عرق، كل يوم يتكلم عن الضباط وأمين الشرطة المخطوفين ويعيد ويزيد فى الكلام والمفروض يكفي على الخبر ماجور ما هو الريس قال لمرات واحد من المخطوفين إذا كنتي عايزة تتجوزي روحي اتجوزي وما تشيليش هم.. عمل اللى عليه هو حيقطع روحه بقى... أما عصام كامل ده حكايته حكاية زى ما يكون حد مسلطه عليهم، كل أسبوع ناشر غسيلهم القذر ولا خايف من ميليشياتهم ولا من أولاد أبو إسماعيل مع إنه شاف اللى عملوه فى مدينة الإعلام وحزب الوفد وغيره وغيره.

ندخل بقى على نص الشعب الغلبان ساكني العشوائيات والقبور، دول بقى ما عملوش لهم حاجة تزعل، قالوا لهم انتخبونا عشان تدخلوا الجنة وآدى كيس سكر وباكو شاى وعليهم كيلو رز، سمعوا الكلام وانتخبوهم.. طيب دول بينتقموا منهم ليه؟ أنت عبيط ولا بتستعبط ما هم فهموا الفولة وعرفوا إنهم لا بتوع ربنا ولا حيدخلوا الجنة، واكتشفوا الملعوب يعني معنى كده أصواتهم ضاعت فى الانتخابات الجاية.. أما شباب الثورة اللى افتكروا إنهم جابوا الديب من ديله وعشان شوية منهم قابلوا رب كريم وشوية اتخزقت عيونهم وكام واحد مخطوف ولّا مرمي فى سجن العقرب ولا حجز الأمن حيركبوا ويحكموا أو حتى يبقى لهم رأي.. أمال اللى قاعدين ثمانين سنة وزيادة تحت الأرض لازم يقبوا ويركبوا على مراوحنا وانتو بقى يا شباب روحوا العبوا على فيس بوك أو تويتر واحشدوا مليونيات زى ما انتو عايزين وابعدوا عن الانتخابات الرئاسية المبكرة أحسن لكم.. نص الشعب ماسك سيرة المرشد ويسقط يسقط حكم المرشد والنبي حد كان شافه قاعد فى الاتحادية ولّا ركب عربية بسارينة ووراه خمسين عربية وسبعين بودى جارد؟!