ساخرون.. كابتن ماجد: لا سحر ولا شعوذة
إذا كان مسئولو نادي "سموحة" لجأوا للسحر والشعوذة لغلق شباكهم أمام هجوم نادي الزمالك فبماذا استعان نادي طلائع الجيش كي يمرمغ بسمعة دفاع الزمالك ويجيبها الأرض؟ّ!
وهل الإسماعيلي ماعندوش مشايخ بتعرف تقفل الشبكة؟!.. دا لو كرة القدم فيها سحر وشعوذة كانت المغرب أخدت كأس العالم عشروميت مرة.. أو حتى بطولة أفريقيا يا جدع.. دا أي شيخ بيعمل العمل لازم يطلب بخور مغربي.. مش كدا ولا إيه؟! الشعوذة والأعمال السفلية منتشرة حسب الإحصائيات في محافظتي المنيا وأسوان.
ورغم ذلك أسوان في ذيل الدوري والمنيا بتلعب في الدرجة التانية ومش عارفة حتى تلعب في الممتاز.. أي كلام وأي هبد بيتقال لتبرير الهزيمة وتتناقله وسائل الإعلام والمواقع وكأنه واقع أنا كدا ممكن أشك إن الأهلي اللي كان في آخر جدول الدوري الموسم السابق وإذ فجأة حصل على الدوري لا بد أن يكون استخدم السحر والشعوذة.
طب إزاى كل الفرق في العالم بتغلب وتتغلب في بطولات الدوري ما عدا الفريق الموجود في مصر ده اللي اسمه الأهلي متغلبش ولا ماتش لغاية النهاردة؟!.. يبقى أكيد بيستخدم السحر والشعوذة.. لا يا سيدي أحب أقول لدماغ معاليك إنها عايزة ترجعنا لزمن البخور.. كفاياكم هبد وتبريرات غير منطقية.. فكُرة القدم يا سادة لا سحر فيها ولا شعوذة.
