النشطاء يسخرون من مرسي وسد النهضة.. دعاء: راح إثيوبيا ليقنعهم ببنائه.. شيربش: وطيت مقامي يابو الدماغ خالي.. آية: اعمل حاجة صح في حياتك.. أسماء: طعن الخناجر ولا حكم العبيط

حمل نشطاء تويتر الرئيس محمد مرسي، مشكلة بناء سد النهضة الإثيوبي وفقدان مصر لجزء من حصتها في المياه، مؤكدين أن مرسي كان السبب في الإسراع ببناء السد نتيجة ضعفه، وتناولوا موقف مرسي تجاه سد النهضة عبر حساباتهم على تويتر في شكل ساخر.
قالت الإعلامية دعاء سلطان: "هو مرسي كان رايح إثيوبيا عشان يقنعهم ببدء العمل في سد النهضة؟!" 
هادي العجمي: "دافعنا عن الرئيس مرسي وطالبنا بإعطائه الفرصة وأكدنا أنه يُحارب من الداخل والخارج لكن تعامله مع إبادة السوريين والسد الإثيوبي تقلل نسبة مؤيديه".
سلطان مصر: "كان من المفترض أن يذهب سيادة الرئيس مرسي لتفقد السد وبناؤه جايز ربنا يجعل الخير المرة دي على إيديه والسد يحصله زلزال الرئيس".
إسراء جابر: "كفاية نهضة يا دكتور مرسي بجد كدا كتير إثيوبيا بتبني في سد النهضة من سنة وأكتر طير النهضة بيرفرف فالعالالي والسد هيجوعنا في المجاري بإذن الله".
وقال شيربش 2000: "يا مرسي لو بعتني خلي التمن غالي.. ده أنا كنت أم الدنيا والسد كان عالي.. وانت اللي وطيت مقامي يابو الدماغ خالي".
وقال مصري: "مرسي سايب موضوع تحويل مجري النيل وقاعد شغال بيشكر ويمدح في أمجاد خيرت الشاطر!! طيب والسد والميه!!" 
نانسي: "كل مصيبة تحصل نكتشف أن التقرير اتعرض على مرسي قبل ما تحصل زي خطف الجنود وسد النهضة.. هو مبيقراش التقارير ولا بيقراها ومبيفهمش؟؟؟!!!!" 
صولا صا: "محدش يعمل عملية انتحارية ويروح يفجر مرسي وسد النهضة".
غادة ناصر: "الغاز ولسة بيروح إسرائيل، السودان عاوزة حلايب وشلاتين، وسد النهضة وبدأته إثيوبيا.. هي النهضة دي استعمال خارجي فقط؟ تصدير بس يعني يا مرسي ؟!!!"
علاء عوكل: "إحنا لسة ملحقناش نخلص هري على فيلم وفضيحة الخطف.. جالنا موضوع تحويل النيل الأزرق وسد النهضة.. ارحمنا يا مرسي يا واش يا واش".
ماجد بندر الدويش: "مصر تتعرض لمؤامرة دولية في السطو على حصتها في مياه النيل عن طريق إقامة سد في إثيوبيا مما يهدد أمنها المائي.. يجب التحرك دوليا".
آية محمد: "مرسي اعمل حاجة خلي شعبك يحترمك لو لمرة واحدة في حياتك اعمل حاجة صح في مصلحة البلد دي".
علاء الدين: "مكتب الإرشاد عايز يعمل مليونية ضد سد النهضة أكيد حيطالب حسين وانشراح بحل المشكلة".
مي عمرو علي: "يعني ولا فيه كهربا ولا بنزين وفيه زحمة وكمان النيل؟ سؤال هو مرسي إيه موقفه من الإعراب؟ مش ديه شغلتك إنك تتصرف ولا أنا بفتري؟" 
أسماء علي: "أنا عارف كويس قوي مين بيقول إيه إزاى علشان إيه.. طعن الخناجر ولا حكم العبيط فيا".
غادة قالت: "سد النهضة ده كارثة بكل المقاييس لكن سقوط مرسي قريب جدا وهييجي رئيس ونظام يعالج الهم ده كله".
الدكتورة شادية متولي قالت: "مرسي حفزهم على نهضتهم وكسة مصر الإخوان".