"قمصان أقوى من السرطان"..هاشتاج لدعم طالب مصاب بالكانسر بكفر الشيخ
دشن عدد من شباب كفر الشيخ هاشتاج على وسائل التواصل الاجتماعي "فيس بوك" لدعم صديقهم محمد محمد قمصان، المصاب بمرض سرطان الدم، فيما كتب محمد قمصان قصة معرفته بالمرض من خلال بوست على فيس بوك.
يروي، محمد، قصته على فيس بوك، قائلا، أنا اسمي محمد قمصان عشان الناس اللي ما تعرفنيش" بحارب سرطان الدم Leukemi.. عايز أقول إن مفيش حاجة دايمة مفيش حد كامل اللي احنا فيه دا من عند ربنا اختباراته وامتحاناته ليها أسباب وانا ببتسم رغم اني محبط وبحاول استمد قوتي من مامتي وحب اخواتي واصدقائي..♥️💪 ف تاريخ 8/ أبريل بالظبط
أول ما تعبت روحت لدكتور باطنة شك أن عندي تيفود وفعلا طلع عندي اتعالجت منه مرة واتنين، وبعد كدا تعبت بردو ورحت لدكتور تاني وقال لي قولون شوية يقول لي زايدة، وكل يوم عند دكتور شكل وفضلت أتشخص غلط لمدة سنة ونص لحد بالصدفة، رايح مع سارة أختي عند دكتوره أمراض جلدية، وكان عندي حاجة زي الغدد ليمفاوية كبيرة بشكل رهيب الدكتورة ردت عليا قالت لي هوا إيه دا، قلت لها ما أعرفش قالت لي: هي دي مش بتوجعك قلت لها لا، أومال انت ساكت عليها ليه، وانا في الوقت دا مطلوب مني تحاليل كانسر من الدكتور اللي أنا متابع معاه، وانا مش عارف وهو كان شاكك أصلا ومقاليش لحد ما يتأكد، ولما نتيجة التحاليل خلصت المعمل كلم ماما وراحت جابتها وهي اللي أخدت الصدمة في الأول، ولما انا عرفت كنت بقول يعني إيه كانسر أهو حاجة زي البرد أو السخونية وهتروح مع الوقت رجعت لدكتور قال لي هو فيه حاجة ف الدم وهتروح لدكتورة أمراض دم وهي هتظبطها وعرفت بقى يعني إيه كانسر"
قولت لماما يعني أكتب بوست ع الفيس بوك ان أنا عندي سرطان؟
قالت لي انت هترجع كدا كدا أقوى وأحسن من الأول مليون مرة، كنت في أول أسبوعين من شهر رمضان، وكان تاني يوم الامتحانات نزلت بوست ع الأكونت بتاعي زي ما هو كدا بظبط سرطان في الدم Leukemi اللهم لا اعتراض على قدرك يا الله ادعوا لي بالله عليكم"
السرطان سبب تعاطف لاعبي الزمالك مع ميتشو
واخواتي واصاحبي عملوا لي هاشتاج
#قمصان_انت_اقوي_من_السرطان.."♥️😊💪
بصراحه حب الناس اللي انا شوفته ما كانش طبيعي بالنسبة ليا وكل الناس اللي أعرفهم واللي معرفهمش كلموني وقلولي احنا بندعيلك ف التراويح وصلاه الفجر وع الفطار وكل وقت ولقيت من ناس متعافيه من السرطان وناس لسه بتحارب بيكلموني بيدعموني وفيه اللي كان بيقولي احنا عايزين نستقوه بيك زي ميكونه لاقو حاجه يتشعبطو عليا ودا ف حد زاته كان شرف ليا ومن هنا بدآ المشوار حته معظم اخواتي واصاحبي مكنوش يعرفو واختي ساره عرفت من ع الفيس عادي زيها زي اصاحبي وكل الناس اللي بتحبني واخواتي وماما قرارو انهم مش هيقولولها عشان هيا تعتبر اللي مربياني وكنا اقرب اتنين لبعض ف البيت بدآت البروتوكول قبل العيد الصغير بيومين وكنت عامل عملية نقل دم وبعدها خت أول جرعه كيمو بعدها بدآت الرحله لقيت خصل من شعري بتنزل اقوم من النوم الاقي شعري ع المخده وع حوض الحمام فضلت فترة سايبه يقع لحد مخت القرار اني هقص شعري زي مشفوفتو ف الفيديو هوا كان احساس صعب عليا بس أن شاء الله هيرجع احسن من الأول وبنزل من غير مالبس ايس كاب ولا أي حاجه وفخور جدا بنفسي وان شاء الله انا اللي هكسب والسرطان هيخصر
السرطان مبيموتش احنا بنموت لما عمرنا بيخلص مفيش حاجه اسمها السرطان انتصر المرض مش نهايه الحياه المرض فرضه عشان نشوف االدنيا بشكل جديد وانا عندي ظن برابي اني هكسب المعركه وانا اللي هنتصر وعندي امل عايش عليه هناك امل مازلت اتنفس ايمان.قوة. صبر.عزيمه شجاعه سآهزم السرطان بإذن الله
وعن امنيته، يقول محمد قمصان ل " فيتو" أن امنيتي الوحيدة هي عمل عمرة لوالدتي، ولقاء" شريف مدكور كونه مثلي الأعلي في محاربة مرض الكانسر".
