خالد سالم يكتب: وصلت خمسة وخمسين (قصيدة)

كنت شاب روش وفالنتين
كان الجسم قوي ومتين
أصبح أي "كرامب"
علاجه سنين
كنت بامشي من حلوان للتبين
صبح المشي من الحين للحين
كنت نحيف
أصبحت تخين
كانت سناني للقصب قاطعين
خوَّخ الضرس.. وسبعة خالعين
كانت المدام تقول القوى المتين
زعلانة دلوقت يا رحمن يا رحيم
كنا طالعين السلم ونازلين
بقت الركب يا دوب شايلين
كانت صحة وكانت وفرة
خفت سرعتنا م المية للعشرين
كان الدش بمية باردة
دلوقتي حرارة فوق التلاتين
صحة ضعيفة وحتى العين
كانت ستة بعت ستين
أمَّال في السبعين ولا التمانين
ليه الأجانب طعمين حلوين؟!
أكيد الأكل مش ممبار وسمين
والبشامل والمحشى والطحين
وأكيد الرياضة والتمرين
وقبل الحركة التسخين
العيب مش في الخمسين
المشكلة ف حياة السنين
شيشة وسجاير ونيكوتين
من النهاردة هابطَّل الدهون
والعب رياضة.. ونزود التمارين
ونمشي من السيدة للحسين
زيَّ عبد المطلب مرة أو مرتين
واحافظ على صحتي بالبروتين
أمشي سكتي واوفر البنزين
الحياة مدرسة.. مش أكل وتدخين
الحياة حلوة
بس بالعقل.. مش بالروتين