الجيش والشرطة والشعب والصحافة والانتخابات
- بعد حكم الدستورية بأحقية رجال الجيش والشرطة فى الانتخابات، سيتغير تكتيك الجماعة لتصدر تعليماتها إلى وزير الاكتفاء الإخوانجى من القمح، ليبدأ فى توفير العدس بدلاً من الزيت والأرز فى معركة البرلمان المقبلة.
- بجاتو يقول: لى الشرف أن أتحدث عن هذه الحكومة بعد ثورة 25 يناير فى البرلمان.
يا باشا حقك.. بس والنبى تقول لى مين اللى هايعمل إعلانات مراوح توشيبا بعد كده؟
- وائل قنديل يُلَقب الأخ مكى بـ"النبيل" علشان ما اتكلمش عن مرسى بعد خروجه من معسكر الحكم.
تصدق فعلاً.. أوسخ حاجة إن البنى آدم يأكل عيش وملح مع الناس وبعدها يطلع يفرش لهم الملاية... الله يمسيك بالخير يا برادعى.
- عريان وتنك.. منتظر 3 مليارات من الإمارات لحكومة جماعته.. ويتهمها بخطف الجنود السبعة.. التسول له ناسه صحيح.
- قانون لذبح القضاة بأيدى نواب وقضاة لم يذبحوا فى محاكمة مكى والبسطويسى 19 يونيو 2006 .. فيك الخير يا أبو علاء.. أجلتها 7 سنين.
- الجمعيات الأهلية التنموية والحقوقية فى انتظار قانون "سوبر صبحى".. غير "صالح" إلا للجماعات.. اقلبوها جوامع وكل ناشط يركب ذقن ويمسك صندوق ويدعو للجهاد أجدع.
- صديقى مسئول مبيعات بشركة أدوية يؤكد لى: الإقبال على الترامادول والفياجرا بعد صعود الإخوان للحكم، يمنعنى من مقابلتك وأصحابنا على القهوة.
والله إحنا كلنا فى انتظار "الكيمياء" بتاعتك قبل ما نتخلع يا سيدى.
- انتخابات بلا معارضة ستجعل من أصدقاء اليوم، الإخوان والسلفيين، أعداء "الغد".. والإسلام هايفضل هو "الحل" فى معركتهم، لكنهم سيظلون "المشكلة"، وستضاف إليهم "معضلة الإنقاذ" إذا ما قررت "الجبهة" خوض الانتخابات.
- ولما وزير "الثقافة" يبقى كده .. مطلوب من النخبة إيه؟
- سعد الدين إبراهيم واسطة مطلوبة للسلفيين عند أمريكا، بعد ما واشنطن اكتشفت "ضحالة" الإخوان .. مش ضحالة الوسيط.
- الشاطر على غلاف أخبار "الأدب".. عادى.. اللى خلى مرسى على غلاف التايمز.
- وزيرة التعدين شايلة الشنطة بتاعة السوق وهى فى استقبال مرسى.. وكأنها بتقول لأطفالها: شوفتوا الاستقبال الرسمى للبامبرز اللى جبته معايا؟
- الجديد فى ستات البيوت بعد الثورة هو حالة النكد الدائم على الأزواج.. بحجة إن دى الديمقراطية والفيصل هو صندوق "القايمة".
- لما تبقى صحفى وتتجوز صحفية.. انتظر أن تتحول إلى ورقة "داتش".. يتعلم عليك أو تطير فى الهواء بعد استعمالك.. ويوم ما تتنطق قوى هاتقلب "ماوس".
- هو فيلم "مرسى وشفيق" ده لسه عرض مستمر؟؟ يعنى مفيش غير فلول وإخوان فى كل سينمات مصر؟؟ طيب ومصر "النهضة" أخبار إنتاجها إيه؟
- طريق مصر الإسكندرية الصحراوى مظلم من بدايته لنهايته.. لكن حوادث السرقة بالإكراه لا تحدث إلا فى وادى النطرون.. هو مرسى وأصحابه كانوا محبوسين فين بالضبط؟
- وبما إن المتأخونين عليهم دين لـ"الجماعة".. مفيش مانع عندى فى انضمامهم لها.. بس اللى أخذ شيء من "مصر" يرجعه الأول علشان دى أُمنا كلنا.
- الفراش العام لنقابة الصحفيين سحب كراسى الريسيبشن كلها علشان مفيش صحفى متعطل يعتصم فى النقابة.
يا خسارة.. المرة دى مافيهاش "ولى" يحاسب على المشاريب ووجبات "كوكى".
- وبعد ما لعبت لعبة "النهضة" فى مصر.. رايح ألعب لعبة "السد" فى أديس أبابا.. وقبل ما أنام هالعب "زوما" فى جنوب أفريقيا..الحرمان وحش صحيح.
- بعد صور تهريب وجبات "كنتاكى" عبر أنفاق غزة.. شعار ولاد ابن الأمريكية اتغير.
"ع القدس رايحين.. ناكل ممبار وسمين".
