ساخرون.. إسماعيل ياسين في سوق الملابس الشتوى: هي الزباين راحت فين يا سمعمع!!
أعوذ بالله من هذا الذي أراه.. أين أنت يا هيئة الأرصاد الجوية.. ما كل هذا الركود.. إننى أشعر بالانبهار.. هي الزباين راحت فين يا خواتى.. يكونوش تاهوا جوه شلاضيمى.. يا داهية دُقى ووسعيلى بُقى.. آه يا شلاضيمى يانى يا ماما
سوق الملابس الشتوى السنادى خال من الزبائن.. كل ده بسبب تصريحات هيئة الأرصاد الجوية التي لا تصدُق أبدا.. لدرجة إن الواحد ما بقاش عارف نفسه هو عايش في فصل إيه بالتحديد.. آه يانى يا تايه يا سمعمع، كل ده كوم والأسعار كوم تانى.. ده أنا علشان أشترى هدوم شتوى ليا وللولية والعيال محتاج أبيع البيت.. لأ والنبى ياخويا ده البيت بالإيجار وما ينفعش يتباع.. آه يانى يا غُلبى يانى يابا.. المحال ترفع شعار "نحن نبيع للأعداء" ولا عزاء لأبناء الوطن الفقراء.. الحقنى يا عم عفركوش يا ابن برتكوش.. نار يا حبيبى نار.. الأسعار نار والجو نار رغم إننا في الشتاء، البياع بيبصلى وكأنى جاى أسرق البضاعة.. آآآآآخ ياما نفسى أدب صباعى جوا مناخيره وأفقع له عين من عيونه اللى بتبرقلى دى.. علشان يحرم يبرق للزباين اللى بتتفرج وتسأل عن الأسعار وماتشتريش!
طب ما هو كلنا بنسأل ومانشتريش.. إيه الغريب في كده.. طب هي دى أسعار ممكن نشترى بيها؟!.. ليه هو إحنا كُفار يا جدع ولا إحنا كُفار!!.. طب هو ده جو أصلا نشترى فيه ملابس شتوى؟!.. ليه هو إحنا بردانين ولا إحنا بردانين يا دى الجدع؟!
أين أنتِ يا هيئة الرقابة على الأسواق.. يا ساكنة بلاد الواق واق.. عقلى يكاد أن يتوقف عن العمل.. طب أين أنت يا هيئة الأرصاد الجوية.. أنا أعصابى خلاص بقت تعبانة.. مش عارف ألاقيها من أسعار الهدوم الشتوى ولا ألاقيها من الطقس الصيفى الشتوى اللى مالوش أي ملامح ده
إننى أشعر بالانحطاط.. آه والنبى ده أنا عندى انحطاط في المُخيخ.. إذن لا بد أن انقشع من هذا السوق.. نعم سوف انقشع.. يلا بقا.. سلامو عليكووووووووووووو
