إسماعيل ياسين في البلكونة: يا مطره رُخى رُخى

آه ياااااادهوتى السودة يانى ياماااما.. ما هذا الذي أراه.. إننا نغرق في شبر من الماء.. إننى أشعر بالإزبهلال.. بقى شوية مطرة يعملوا في الناس كه.. تعالى يا ولية يا مجنونة بصى معايا من البلكونة.. انها هزُلت وذبُلت وتنيلت بستين ألف نيلة

أين أنت يا وزير التنمية المحلية.. شوارعنا راحت في خبر كان.. طب أين أنت يا وزير الإسكان.. البلاعات مسدودة بالباذنجان.. أين أنت يا سيادة المحافظ.. عقلى سيتوقف عن العمل.. رجعوالى عقلى والنبى.. أو رجعولى البلاعات اللى نصها اسرق من الشوارع والنص التانى مسدود.. أين أنتم يا نواب البرلمان.. لماذا أصواتكم مكتومة.. أم أنكم تنتظرون بيان الحكومة.. طب زغرتى يا ست سومة.. نوابنا مأنتمين مع الحكومة.. الحقنى والنبى يا عم جزر.. آه يااااااااااااجزر يا جزر.. ده إحنا غرقنا في "شبر ميه" ولا أدرى أين بنيتنا التحتية.. أين الفول أين الطعمية.. تغور البامية والملوخية.. شوارعنا غرقت في شبر مية

هيئة الأرصاد بقالها شهر بتحذرنا من الأمطار.. مع إن الأمطار دى خير مش شر.. ده إحنا طول عمرنا بنقول يا مطره رُخى رُخى.. على قرعة ابن اختى.. علشان القرعة ترعرع ويطلعلها شوية شّعر.. لكن دلوقتى بقينا نحذر من الأمطار.. ومع إننا في عرض لتر مّيّه.. إلا أننا غرقنا في شبر ميه، وماعندناش وسيلة مقاومة توحد ربنا نحمى بيها ولادنا من الكوارث المفاجئة.. المرور تعطل في غمضة عين والشوارع اتقفلت.. تلاميذ المدارس بيصرخوا من الرعب.. أعمدة الكهرباء تصعق الأطفال.. وكل ده من إيه.. من شوية مطرة.. والنبى يا مطرة بلاش ترُخى.. وسيبك من قرعة ابن اختى.. إحنا عايزينه أقرع كده ومن غير شّعر، وبما إن الحكومة مستكترة الكام مليار اللى هيتصرفوا في البنية التحتية علشان خاطر يومين مطرة في السنة.. فخلاص بقى.. كل واحد يلم عياله من الشارع وبلاش تخلوهم يغنوا ويقولوا يا مطرة رُخى رُخى.. علشان الميه مترخش تانى.. وآه يانى يا شلاضيم بُقى اللى تعبانى.. إننى سأتوقف عن الكلام.. يلا بقى.. سلامو عليكووووووووووووووووو