مفاجأة.. جزء جديد من فيلم «678» مستوحاة من أزمة عمرو وردة

فاجأ المؤلف والمخرج محمد دياب، جمهوره، بإعلانه العمل على جزء ثاني من فيلمه «678»، على أن تكون قصته مستوحاة من أزمة عمرو وردة لاعب منتخب مصر، الذي عاد لصفوف المنتخب بعد استبعاده على إثر اتهامات بالتحرش الجنسي.

وكتب محمد دياب عبر حسابه الشخصي على موقع التواصل الاجتماعي «فيس بوك»، : «الناس الكتير اللي محبطة من اللي حصل في موضوع ورده، لسه عندنا كتير نقدر نعمله. من أول مقاطعة المنتخب، لغاية إننا نروح الإستاد ونشجع ضدهم».

تابع: «لو في مصر وردة يقدر يهرب من العقاب فاليونان اللي بيلعب فيها وإنجلترا -اللي بيلعب فيها اللاعيبه اللي ايدوه- بلاد مبتتسامحش في التحرش. في أوروبا القصة بتفاصيلها الواضحة لما تتعرف بقوة السوشيال ميديا، ميه في الميه هتأثر في كاريرهم وهتشوفوا وردة فريقه بيسرحه».

وواصل محمد دياب متحدثًا عن التحرش: «من خبرتي المتواضعة في موضوع التحرش عشان الفيلم إلى عملته وقضيت فيه ٣ سنين بحاول أفهم المتحرش بيفكر ازاي، ورده متحرش محتاج علاج نفسي وإعادة تأهيل بس بسبب أن الموضوع اتحل بسهوله فهو مش هيسعي للعلاج ومؤكد هيرجع يعمل مصيبة، حتى لو اتجوز فممكن يضرب مراته مثلًا».

اختتم «دياب» حديثه بالكشف عن تفاصيل فيلمه الجديد، موضحًا: "شخصيًا قررت أن الموضوع ده هيبقي ٦٧٨ الجزء التاني، عشان لما صلاح والمحمدي يلاقوا اسمهم في كل مهرجانات العالم وجرايد العالم الفنية مربوط بأنهم أيدوا متحرش يبقوا يعرفوا أن الله حق، وكل شخص مشهور هيفكر يشاركنا أفكاره الرجعية المدمرة يفكر ألف مرة".