صورة سمكة محمد صلاح الثانية تثير غضب النشطاء: "متنساش تبقى تعدي على المعسكر"
أثارت صورة محمد صلاح Mohamed salah، لاعب المنتخب الوطني، المحترف في صفوف فريق ليفربول الإنجليزي، التي يمسك فيها بسمكة اصطادها من على متن أحد اليخوت بالغردقة، ردود أفعال غاضبة لدى جمهور الكرة المصري، حتى إن أحدهم طالبه بالمرور على معسكر المنتخب من أجل البطولة الأفريقية 2019، المقامة بمصر.
وقال محمود أبو العزم: "أبو صلاح متنساش وحيات بنتك مكة تبقي تعدي ع المعسكر بتاع المنتخب تشقر عليهم شوية عشان بطولة أفريقيا أنا حاسك ناسي صح".
ورد إبراهيم حسبو: "بلا معسكر بلا بتاع"، وعلق نعيم مصري: "أبو تريكة نصحك تخفف ظهور على السوشيال ميديا يا فخر العرب وحبيب قلبنا، بدنا منك تخلي إجازتك لنفسك وتركز على أمم أفريقيا، بدنا الكرة الذهبية يا محمد".
وقال العاصي: "بص أنا مقدر الإجازة والروقان عشان بتحرم منها فترات طويلة جدا، بس صباح الخير فيه بطولة ممكن تيجي عشان نلحق نلم فرقة... بتاعتنا ونشوف هن... إيه ف البطولة.. عشان الفضيحة بس الله يسترك".
وأضاف فارس عباس: " والنبى يا صلاح ياخويا أنا عارف إنك في تعب ومشاغل وكده بس في معسكر للمنتخب بيقولوا شغال لبطولة مهمة كده كمان تسع أيام أبقى حاول تشقر على اخواتك هناك ليكونوا مزنوقين فيك أو كده".
وعلق كريم السيد: "فضها بقي يا صلاح...وعايزين نركز وخلي بالك لو وليد سليمان ركب صعب حد يجيبه لأنه يمتلك كل مقوماتك بل وتزيد المهارة".
ورد أحمد السعدي: "ياأسطى بيقولوا في بطولة أفريقيا والمنتخب بتاعنا عامل معسكر لو مفيهاش إزعاج ابقى عدى عليهم كده خمسة شوفهم بيعملوا إيه كانوا بيسألوا عليك".
وتابع محمد السيد :"ياعم ده وقت م يعجبو الميعاد يروحلهم هو لسه بيتخيل نفسه وهو بيلعب جمب الناس دي".
يذكر أن بطولة الأمم الأفريقية 2019 تقام في مصر في الفترة من 21 يونيو حتى 19 يوليو المقبل، ويقوم المنتخب المصري بالتدريب استعدادًا للبطولة.
