إسماعيل ياسين في شهر رمضان: الحقونى بقزازة نشادر تفوقنى

الحقنى يا عم عفركوش يا ابن برتكوش والنبى.. يوه.. ده أنا نسيت إنك بتتسلسل في شهر رمضان.. طب روح يا شيخ إلهى تفضل متسلسل طول عمرك ولا أقابلكش في أي فانوس من فوانيس رمضان اللى خلت قفانا يقمر عيش قدام العيال وأمهاتهم، آه والنبى ياخويا إننا في غاية الانحراج من العيال وأمهاتهم بسبب الفوانيس والياميش واللحمة والفراخ والبط والخضار والذي منه.

قال إيه ياخويا الفانوس اللى كنا بنشتريه بخمسة شلنات دلوقتى بقا بخمسميت جنيه.. وكل جنيه لازم ينطح الجنيه اللى تحته.. أما فوانيس الغلابه فسعرها 150 جنيها وأنت طالع.. كما أنه لا توجد فوانيس لمن هم تحت خط الفقر.. ده إحنا غلابة قوى يا عمى الله يسترك.. ده إحنا لسه بنقول يا هادى ورمضان يا دوب داخل علينا برجله اليمين والمرتبات تعانى من حالة التبخر، وقد أوشكت على التلاشى.. وأنا هنا أصرخ وأنادى "الحقنى ياعم عفركوش يا ابن برتكوش" لكن عفركوش هو الآخر مثل المدام تماما.. عامل ودن من طين والتانية من عجين.. طب الحقونى بقزازة نشادر تفوقنى والنبى

يا داهية دقى ووسعي لى بُقى.. إننى في منتهى الانعياى.. أين أنت يا موائد الرحمن.. ده إحنا غلابة قوى يا عمى.. حتى موائد الرحمن كشت وبقت بتتعمل بالمشاركة في الميادين العامة.. الله يرحم الأيام اللى كان كل شارع من شوارع المحروسة به مائدة رحمن.
آه يا مين يعزمنى أنا والعيال وأمهم لمدة تلاتين يوم وياريت يجيب لنا لبس العيد وإحنا مروحين ويدفع فلوس الدروس الخصوصية بتاعت العيال علشان الامتحانات على الأبواب لزوم المراجعة النهائية في طريقة التعليم المهلبية.

عموما كل سنة وأنتم طيبين وللعرق سوس شاربين وبالمحاشى والبط والرومى فطرانين.. ويجعلنا وإياكم من المعزومين طوال أيامنا الجايين.. ولن أقول لكم في هذه الأيام المفترجة إلا رمضان كريم علينا وعليكم وعلى كافة المصريين.. مسيحيين ومسلمين.. وصوما مقبولا.. ومسلسلات رمضانية سعيدة وبرامج مقالب مفترية.. وسهرات رمضانية عائلية.. ويلا بقى.. سلامو عليكوووووووووووووو