يا خاطفين دلوني !!

فيه كوارث طبيعية زي الزلازل والبراكين والفيضانات والسكتات القلبية وفيه كوارث غير طبيعية زي انقطاع الكهرباء واختفاء البنزين والقمح منور فوق سنابله بس هتاكل أربعة أرغفة بس كل يوم والخطف والذي منه .. زمان كانوا بيقولولنا لو حد قالك تعالى أوديك لبابا .. إوعى تروح
ولو حد حب يستغل الطمع الآدمي اللي فيك ويقولك تعالى وأنا أجيبلك شيكولاتة .. أوعى تروح. 
ولو بنت بقى لابسة حلق دهب كانوا بيقولولها إوعي حد يقولك تعالي معايا .. صرخي ولمي الناس عليه. 
جنود على الحدود .. أخدوا تدريب ووقفوا يحرسون مصر من أي عدوان خارجي أو متسللون أو هربانين من ع الحدود وما كانش معاهم بلاي ستيشن ولا كمبيوتر ولسة ثقافة الوي ما وصلتلهمش. 
و أشخاص تانيين .. خطفوا جنود الدولة وساوموا عليهم أو لسة و ما حدش عارف عنهم حاجة .. ولا الأجهزة الحساسة في الدولة اللي لو عايزة تعرف ولا مؤاخذة لون ملابسك الداخلية إيه هتعرف؟ ولا الجيش يعرف؟ ولا الناس اللي في الشارع تعرف؟ طب مين اللي يعرف؟
وأخيرا وبعد طول تساؤل وبعد مرور أيام كالعادة على الكارثة غير الطبيعية والتي نحن مضطرون على استحمال نكدها حتى آخر رمق من أنفاسنا اللي كان فيها شوية أمل ..إلى حين أن يدلنا الخاطفون العباقرة النابهون ما الذي من المفترض أن نفعله؟ 
أو يدلونا على طريقة جنودنا اللي على الحدود ما يضربوش بالنار أو ما يتخطفوش وأهه ينوبهم فينا ثواب .. عجايب!.