كابتن ماجد: "خسارتي في لاسارتي"
![كابتن ماجد](images/no.jpg)
أنا متهيألي كده إن الأهلي محتاج معجزة، علشان يكمل في دوري أبطال أفريقيا.. زي ما هو محتاج معجزة علشان ياخد الدوري المصري.. زي ما هو محتاج معجزة علشان ياخد الكأس برضه.. أنا دلوقتي عرفت ليه الناس بتقول على الأهلي إنه نادي المعجزات.
أنا متهيألي أن الأهلي محتاج حاليا لمدرب تاني بدلا من "مارتن لاسارتي" بأسرع وقت.. الراجل ده عارف كل حاجة عن الفريق، وعارف طموحات جماهير الفريق، ورغم كده ماعندوش أي إبداع.. وأنا بطالب بتغييره فورا حتى لو كنا في نهاية الموسم.. دا أنا ناوي أرفع يافطة في قلب استاد "مختار التتش" واكتب عليها "خسارتي في لاسارتي".. لأن الراجل ده هيخسرنا كل البطولات السنة دي وابقوا قابلوني.
أنا أول مرة أشوف الأهلي منهار تماما أمام صن داونز.. وأول مرة أشوفه بيتغلب بالخمسة.. والخمسة نظيفة ما فيهاش أي رتوش ولا حتى هدف من الأهلي يخزي العين.. والله خمسة وخميسة عليك يا لاسارتي.
أول مرة أشوف الأهلي عاجز لمدة 90 دقيقة، سواء أمام صن داونز أو أي فريق في العالم.. إنها أكبر هزيمة أفريقية في تاريخ مصر يا عم لاسارتي.. إنه السقوط بمعنى الكلمة.. ده الأهلي بقى له 8 أشهر لم يفز بأي مباراة أفريقية خارج أرضه.. يعني بالتحديد منذ قدوم لاسارتي.. الكلام كتير، والمساحة مش هتكفي لكننى في النهاية أؤكد أن "خسارتي في لاسارتي".