حرز حرز يا عم الحاج
• ما أحلى أحرازك يا داخلية.. تخيلوا معي ماذا كانت أحراز الداخلية في قضية التظاهر أمام منزل وزير الداخلية المتأخون 16 قطعة غيار داخلي حريمي + 6 قطع غيار داخلي رجالي مقاسات مختلفة من سمول إلى إكس لارج .. ويا ترى رفعتوا البصمات من على الأحراز ولا استسهلتوا ورفعتوا صاحب البصمة من بابه؟.. أرجو نقل المحاكمات إلى كارفور.
• إقليم قناة السويس مباح للأجانب بحق الانتفاع ... أين نساء مصر؟.. الأمل معقود عليكن الآن لأن للأسف رجالتنا مشغولين بأحراز الداخلية للملابس الداخلية اللى اتمسكت أمام منزل وزير الداخلية.
• بونات وكوبونات للأكل والبنزين ويا سلام لو الواحد حب ياكل أكتر من اللى مكتوب على البون واتمسك تلبس بحرز فيه رغيفين زيادة أعتقد الداخلية هتقبض عليه فورا تنفيذا للقانون والدستور بتاع العجلة تدور والنيابة كالعادة هتأمر بأربعة أيام مش حبس لا سمح الله وإنما أربعة أيام يشترى عيشه من فرن فينوس.
• تم القبض على عامل دليفرى ( طيار ) أمام محكمة التجمع الخامس وكان حرزه نص كيلو سبيط غير مدرج بالأوردر وكان عقابه سريعا فخد خمس سنوات وستة أشهر حبس.. والخمس سنين علشان السبيط والستة أشهر علشان نسى الطحينة.. والله العظيم اتقبض عليه بجد واتحكم عليه بجد.. مش مصدقين.... ليكوا حق ما الحرز اتاكل خلاص.
• تحت عنوان اخلع يا أفندم.. رأينا كلنا وزير الرياضة المتباهي بإنجازاته الوهمية وهو بيخلع بأمر من الحارس الخاص له وبمنتهى الغطرسة خلع الوزير وجرى زي ما رئيس الوزارة جرى فى مستشفى البدرشين عقب حادث القطار... وطبعا وزير الرياضة وهو رياضي طلع يجري لحد طريق مصر الإسماعيلية الصحراوي وتوقعنا كلنا بعد هذه الفضيحة وخصوصا إن ألتراس زملكاوى "وايت نايتس" حرزوا اللاب توب بتاعه.. ماذا توقعنا؟
توقعنا بيانا من الوزير الهارب ينتهي باستقالة حفظ ماء الوجه... لكن فوجئنا بالوزير على الفضائيات بالساعات يتحدى بلا أى حياء وعلى الرغم من نبرة الحزن لفقدانه أعز ما يملك وهو اللاب توب بتاعه إلا أنه كان بيضحك زينا... طب إحنا بنضحك عليك انت بقى بتضحك على إيه "أكيد شفت فيديو خلعانك على اليوتيوب" وعلى فكرة عندك حاجه من اتنين:
يا تقدم استقالتك أو تكمل مدتك جرى والجدع يحصلك وخصوصا إنك عامل خطتك الرياضية حتى عام 2020 يعني علشان تنفذها هيكون اتقطع نفسك.. عموما استمرارك فى الوزارة يرسخ مبدأ إذا لم تستح فاخلع ما شئت ونصيحة أقدمها لك لو حبيت تعمل مؤتمر صحفى تانى ما تروحش لوحدك ابقى خد باباك معاك.
