نادر صلاح الدين: فيديو الجنود المختطفين.. كوميدي
قال السيناريست نادر صلاح الدين تعليقًا على الفيديو الذي انتشر منذ قليل على مواقع "يوتيوب" و"فيس بوك" على حسابه "فيس بوك": "فيديو كوميدي للجنود المصريين المخطوفين.. على افتراض أنهم الجنود المخطوفون .. ليه بقى إلحقنا يا ريس .. وفى نفس الوقت .. اتحرك يا وزير الدفاع إنت قاعد على كرسيك واحنا هنا مخطوفين.. وبعدين إيه حكاية تعبنا من التعذيب، ومش باين يعني دراع فيه خدش ولا وش فيه خربوش".
وأضاف: "وبعدين هم خطفوهم في التوحيد والنور وطقّمولهم لبس مدني.. وليه؟؟ فين لبسهم الميري.. خايفين يتوسخ مثلا.. وبعدين هم مش قالوا حاطينهم في أماكن متفرقة علشان يشتتوا جهود الإنقاذ .. صوروهم يعني في الأول (قبل مايعذبوهم) وبعدين وزّعوهم على أماكن متفرقة .. ولا ده أوردر تصوير (بعد التعذيب اللى مش باين) فهم دلوقتي في مكان واحد".
واستطرد: "بيتهيألي لازم الجيش يوضح للناس .. أنا عن نفسي مش محتاج توضيح .. ده فيديو مضروب تأليفًا وإخراجًا وتمثيلًا .. وخصوصًا البرويه اللى في الآخر بتاع إلحقنا يا ريس .. عمومًا كدة الواحد اتأكد أن اللي بيحصل في سوريا من نفس النوع .. وإنهم ناويين يطبقوا سيناريو سوريا هنا .. يا رب الناس تفهم بقى وربنا يهدي".
وأكمل: "على فكرة لو كلامي طلع غلط فيبقى الجيش لازم يدرب عساكره يكونوا أنشف من كدة، أو لو مش حاينفع يبقوا أنشف من كدة يبقى يدربهم تمثيل علشان المواقف إللي زي دي".
