هاشتاج «باسم_مرسي» يتصدر تويتر بعد عودته للزمالك مرة أخرى
![فيتو](images/no.jpg)
دشن نشطاء موقع التدوينات القصيرة تويتر هاشتاج «#باسم_مرسي» بعد طلب إدارة الزمالك عودته للفريق من جديدة وفسخ تعاقده مع سموحة، بعدما كان معارًا من الزمالك للنادي الساحلي لمدة 6 أشهر دون مقابل، وجاء الهاشتاج، ضمن الأكثر تداولًا على الموقع.
وهاجم باسم مرسي لاعب منتخبنا الوطني، إدارة نادي الزمالك؛ بسبب الطريقة التي عامله بها النادي منذ عودته من الاحتراف في اليونان، وطريقة عودته إلى النادي بعدما وقع لسموحة ونقل محل سكنه إلى الإسكندرية وبدأ التدريبات مع النادي الساحلي.
وقال مرسي خلال عدة تغريدات على موقع التدوينات القصيرة «تويتر»: "تلقيت اليوم اتصالا من مسئول في نادي الزمالك يطالبني بالرجوع، قالي بالنص عندى ليك مفاجأة الزمالك عايزك ترجع وتروح نادي تانى بدل سموحة، إحنا اللى أخرنا البطاقة الدولية عشان لو كنت لعبت الماتش مكناش هنعرف نرجعك".
وأضاف مرسي: "بسبب موضوع معين بقيت أنا طرف فيه بدون إرادتى، دلوقتى قدامى اختيار من اتنين الأول إني ألعب في الزمالك والمدرب مش عايزنى بألف جنيه في ست أشهر، الاختيار التانى إنى انتقل لفريق ترتيبه الأخير في الدوري، هل أنا بعد ما لعبت أربع مواسم في الزمالك، حصلنا فيها على ٥ بطولات وأحرزت ٥٣ هدفا، ده يكون مصيرى من مسئولي نادي الزمالك؟!".
وأكمل مرسي: "قبل كده أنا مكنتش بطلع اتكلم، بس الموضوع يوصل إن يتقال إن التأخير بسببي في موضوع البطاقة الدولية وتشويه سمعتى أن ده بسبب خلاف مادي بينى وبين النادي اليوناني في ده مش صحيح، أنا عقدي اتفسخ رسمي من الاتحاد اليوناني، لو مكنش اتفسخ رسمى مكنش يحق لي إنى أتمرن مع نادي سموحة".
وتابع: "أنا في وقت إقامتي كاملة في اليونان، حصلت على ٥ آلاف يورو فقط واتنازلت عن جميع مستحقاتي للزمالك وجددت سنتين وتنازلت عن ٤ ملايين جنيه عشان يوافقوا على احترافى، وعند انتقالي إعارة لسموحة جددت سنة كمان على بياض".
وعن رجوعه إلى نادي الزمالك من جديد قال مرسي: "أنا هرجع نادي الزمالك مش لو بألف جنيه لو ببلاش لأن شرف ليا إنى ألعب في نادي الزمالك، مكنتش حابب إنى أتكلم رغم اتصال عدة برامج بيا من وقت وصولي للقاهرة لتوضيح عدة أمور بمقابل مادى بس أنا كنت برفض".
وعاد مرسي من جديد لمهاجمة مجلس إدارة الزمالك، قائلًا: "أنا حاليًا بعد ما استقريت في الإسكندرية ونقلت أسرتي وأغراضي واستأجرت محل سكن، تم إبلاغي إنى لازم ألغى كل ده وارجع حالًا يا أقعد ست شهور ف البيت".
وطالب مرسي من الجماهير التي كانت تتهمه بافتعال المشكلات أن يروا الصورة كاملة قبل الحكم عليه: "يا رب الناس اللي كانت بتتهمنى إنى مقصر طول الوقت، وبعمل مشكلات تكون الصورة واضحة لهم، أنا طول الوقت بتحط في مشكلات أنا مش سبب فيها، آسف على التطويل بس كان لازم التوضيح".