إسماعيل ياسين في وزارة القوى العاملة: ممكن توظفونى عندكم؟!.. بس بلاش تشغلونى دليفرى والنبى

آه يا شلاضيمى يانى ياماما.. إننى أريد أن أتوظف وظيفة ميرى.. آه والنبى ياخويا نفسى يبقالى معاش مضمون.. ومرتب مضمون.. وتأمين صحى زى البنى آدمين الموظفين اللى ماحدش يقدر يرفدهم بجرة قلم.. إننى أشعر بالإعياء.. نفسى أتعين بالمؤهل بتاعى كما كنت أحلم وأتمنى..

نفسى أكون موظفا يحولوه للتحقيق لو أخطأ وليس عاملا يقولون له روح بيتكم لمجرد أن شلاضيمه مش عاجبه صاحب الشغل.. نفسى أروح أمضى حضور وأروح وزميلى يمضيلى انصراف في نهاية اليوم.. آه والنبى دا أنا غلبان قوى ومتشحطط وكل شوية تلاقينى في شغلانة شكل..

يا داهية دقى ووسعيلى بُقى.. إلحقنى يا وزير القوى العاملة والنبى وشوفلى وظيفة.. بس متكونش زى الوظايف اللى عندك دى.. حاكم أنا عارف إن سيادتك مقضيها مؤتمرات توظيف في كل المحافظات من نوعية فرد أمن ودليفرى في مطعم وبياع في محل ملابس..

دا أنا اللى صدقت تصريحات سيادتك بأنك بتوظف الخريجين وكل أسبوع بتوفر ييجى 5 آلاف وظيفة في كل محافظة.. أتارينى ما كنتش أعرف إن تصريحات الوزراء تحتاج إلى مواطن له مواصفات خاصة.. آه والنبى ياخويا زمبقولك كدا.. إنها تحتاج إلى مواطن طويل وأهبل ولابس طرطور علشان يوافق يتوظف دليفرى بعد كل السنين دى في التعليم وهو فاكر نفسه هيشتغل زى أبوه وعمه وجوز أخته الكبيرة.. لا واللى يغيظك ويغيظنى ويغيظ أمة لا إله إلا الله إن الوزير بيقول على الشباب أنهم مش عايزين يشتغلوا وبيرفضوا الوظايف..

طب بالله عليك يا معالى الوزير هي دى وظايف؟!.. ما هي الشغلانات دى مرطرطة في السوق ومش محتاجة مؤتمرات توظيف ولا حتى محتاجة لوزير يقدمهالنا ولا تحتاج لشهادات ولا لمؤهلات عليا.. إنها فقط تحتاج لشاب عايز يشتغل وياكل عيش.. آه والنبى ياخويا الوظايف بتاعتك دى ممكن يجيبهالى عم أحمد البواب أو حتى السواق بتاع سيادتك ولا كنتش حضرتك تتعب نفسك وتعمل مؤتمرات توظيف ولا دياولو.. آه والله زمبقولك كدا..
عموما أنا مش هطول على معاليك.. يلا بقا.. السلامو عليكووووووووووووووووووووووو