أريد حلة!!
بعد الفحص والتمحيص فى كل القوانين الجديدة اللى صدرت من أول الدستور البديع إلى قانون السلطة القضائية ومشروع تنمية إقليم القناة اللى بيفكرنى بمشروع توشكى توشكى آه.. توشكى واهه كلها مشاريع وقوانين ما حدش فاهملها حاجة، لقيت إن كل القوانين دى هتخلى مصر زى الست اللى جوزها مديها على نافوخها ومصبحها بعلقة قانون متقطع ستين حتة وممسيها بعلقة مشروع هيقطعها هى نفسها ويبيعها حتة حتة وعليه.. تذكرت أفلام سينمائية مالهاش حل..
"موعد على العشاء".. ومصر طابخة بإيديها الحلوين أحلى مسقعة وعزمتهم على عشاء أخير يقابلوا بعدها رب كريم ويمكن نفهم ساعتها ليه القرض اتأخر كل ده وقبله بيتم توزيع العيش والبنزين بالكوبون.
"زوجة رجل مهم".. ومصر بنت الناس الطيبين أبوها يتقتل بدم بارد وهى واقفة تتفرج عليه من مجنون فاكر نفسه أبو السلطة والمفهومية.
وأخيرا فيلم "أريد حلا" وساعتها اسمه لازم يتغير لـ"أريد حلة".. لأن مصر مش هيبقى ليها أى حلول.. وجوازة سنين مالهاش حل غير إنها تاخد حلة تلبسها على نافوخها وتمشى بيها فى الشارع وترقص رقصة فرحة السلطانية بالقوانين المهلبية.
صراحة.. مفيش طبيخ أكتر من كده!!
