تفاصيل جديدة في واقعة سائق تاكسي كوبري أكتوبر (فيديو)

كشفت فاطمة العبادي، ناشطة بموقع التواصل الاجتماعي "فيس بوك"، عن تفاصيل جديدة في واقعة التعدي على سائق تاكسي، من قِبل صاحب سيارة ملاكي أعلى كوبري أكتوبر.

وروت فاطمة العبادي، على فيس بوك قائلة: "إمبارح وأنا طالعة كوبري أكتوبر من طالعة رمسيس، سواق تاكسي قطع عليا أنا والعربيه الملاكي اللي في الفيديو بعرض الطريق، وفجأة وبسرعة رهيبة صاحب العربية الملاكي فرمل جامد، وكان جنبه واحدة من الواضح أنها مراته، وشايلة طفل رضيع على كتفها واتخبطوا جامد في التابلوه هيا والبيبي وطلع جري".

وأضافت: "صاحب العربية الملاكي جري وراه وحاول يحجز عليه في آخر الطلعة وشاور لأمين شرطة يوقفوا، وسواق التاكسي طلع جري برضه، بعد أمين الشرطة بدقيقتين ظهر تاني قدامي سواق التاكسي، وواضح أنه مش طبيعي وشارب حاجة وعمال يشتم ويسب في صاحب العربية الملاكي بأقذر الألفاظ، وكمان يحجز عليه وييجي قدّامه عشان ميعديش مفيش بعد كده بجاحة.. في الدنيا عمال يجي يمين وشمال ومنظر مرعب ممكن يروح فيه ناس كتيرة وعربيّات تانية كل ده نتيجة واحد شارب".

وتابعت فاطمة: "سواق التاكسي فضل يحجز عليه وقطع عليه الطريق تاني عند وصلة ١٥ مايو، ووقف قدام العربية الملاكي، وكمان نازل يتخانق ويضرب، وراح زقه والله العظيم جامد وقعه على الكوبري اللي في النص وقدام العربيات اللي طالعه، ولولا أن الدنيا كانت زحمه شويه كان زمان عربيه خبطته وراح فيها".

واستطردت: "صاحب العربية الملاكي عمال يقوله يا ابني هعورك، والتاني مش طبيعي وبرضه بيضرب ومسكه من رقبته وخنقه وقطعله التيشيرت.. طبعا صاحب العربية الملاكي كان خلاص جاب أخره، فطلّع مسدس وحاول يضربه بضهره لحد ما جات مره واحدة على راسه".

ووصفت فاطمة ما حدث قائلة: "الناس اتلمت.. روحت أطمن على البنت وابنها البيبي وكان منهار من البكاء وعماله تحاول تهديه، علشان تنزل تتطمن على جوزها، فالناس قالت لازم يتعمل محضر في صاحب العربية الملاكي، قال ياريت ده يتحلله أكيد شارب حاجة".

وتابعت: "سواق التاكسي واضح أوي أنه خاف وابتدى يحاول يتصل بحد، شوية وبعت لصاحب العربية الملاكي أنه عايز أي فلوس ويمشي، الغريب أن فيه واحدة ست مش عارفه أي حاجة عن الموضوع، مصورة بس صاحب العربية الملاكي وهو بيضرب سواق التاكسي وبيدافع عن حياته، وبتقول كمان أنه خبطه، والأعجب و زي ما واضح في الصور والفيديو أنه مفيش أي خبط في العربيتين ولا حتة فتفوتة إزاز على الأرض".

واختتمت فاطمة قائلة: "ازاي بنشهر بناس محترمه كده، الله أعلم البيبي حصله إيه، مش كفايه اللي شافوه، إزاي الناس بقت كده وبتردد أي كلام وخلاص".

يذكر أن الإعلامية إيمان الحصري، مقدمة برنامج «مساء dmc»، المذاع على فضائية «dmc»، عرضت مقطع فيديو يرصد مشاجرة بين سائق تاكسي وقائد سيارة ملاكي أعلى كوبرى أكتوبر.

ويظهر في الفيديو اعتداء قائد السيارة الملاكي على سائق التاكسي بسلاح ناري، أخرجه من بين طيات ملابسه أثناء المشاجرة بينهما.