جعلوني.. متوحشا!

في واقعة فساد من النوع الكوميدي، لم تخلُ من الفهلوة المصرية المعتادة.. فوجئ رواد الحديقة الدولية بمدينة نصر بعرض حمار بلدي على أنه حمار وحشي من أحراش أفريقيا.. وقد انتشرت صورة الحمار المسكين الذي تعرض لعملية تلوين بدائية بخطوط سوداء لإيهام زوار الحديقة أنه حمار وحشي أصلي!

لكن الحمار المسكين وقف في الشمس شوية.. فساحت البوية والحمار المزور "اتشلفط" يا عيني وبقى شكله مسخرة! (بلاش نعيب على الحمار علشان مايجيلناش في ولادنا).. لأن الحمار في الأول والآخر مالوش ذنب.. والذنب ذنب اللي بدل الحمار الوحشي (المستورد) اللي بالشيء الفلاني بحمار بلدي مدهون! وأكيد الحمار الوحشي (اتسلك) وبمبلغ محترم.

من أجل هذا ولهذا.. وزي ما فتحنا تحقيق في وقائع فساد مستشفى 57357 ولسه ما عرفناش انتهت على إيه.. ومش هنعرف! عاوزين برضه نفتح تحقيق في واقعة الحمار المخطط.. علشان نداري على العملة السودة دي!! عفوا... هي سودة ومخططة بالطول..

وكمان نجيب حق الحمار الغلبان اللي مش عارف له شغلة محددة في مصر.. مرة يتركب ومرة يتاكل كباب وكفتة وأخيرا يستخدم في التزوير!

فضحتونا قدام "ناشيونال جيوجرافيك".. طيب كنتوا استخدموا ألوان ثابتة.. وهاتوا واحد حريف تلوين.. ولا حتى كنتوا اشتريتوا للحمار تيشيرت مخطط جاهز من تمن السبوبة.. وطبعا الفاسد اللي عمل العملة دي متخيل أنه بيعمل معروف في الحمار وبيرقيه درجة.. مع إن الحمار البلدي نفسه مستغرب من اللي بيحصل له.. لكن ده حال البلد.. ما حدش بيشتغل الشغلانة اللي نفسه فيها.

ومن هنا أناشد السادة المحققين القيام بمراجعة جميع الحيوانات بالحديقة.. والتأكد من زلومة الفيل لتطلع خرطوم بلاستيك متركب على عجل جاموس! ومن قرون الغزال ليطلع معزة ومركبين لها عصايتين مقشة! ولا أقولكم مهما قولت.. خيالي وخيالكم لا يمكن هيجيب براعة وابتكار المفسدين في بر مصر.

الذين جعلوا الحمار المصري الطيب الأصيل.. حمارا متوحشا!