السلم الكهربائي في أرض اللواء يبتلع يد طفل (صور)
أصيب طفل بإصابات خطيرة في يده بسبب خلل في السلم الكهربائى للمشاة في منطقة أرض اللواء بشارع السودان بالجيزة.
ففي الساعة الحادية عشر والنصف من مساء أمس الخميس، حدثت كارثة كادت أن تودي بحياة طفل يبلغ من العمر خمس سنوات، وتروي عمة الطفل رانيا حمدي وقائع الحادثة لـ "فيتو"، فتقول: "ابن أخويا كان مع جدته، وكانوا طالعين على السلم الكهربائي في شارع السودان، عشان يروحوا أرض اللواء، وفجأة وهم طالعين في آخر درجتين السلم اتهز جامد، وآخر درجة اتفتحت".
وتتابع رانيا: "ابن اخويا وقع بسبب هزة السلم، وأمي كمان وقعت لكن الناحية اللي برة على الكوبري، لأن ابن أخويا كان وراها، فوقع في الدرجة المفتوحة، وكانت إيده جوة، فالناس شدوه وإيده اتقطعت بجروح خطيرة جدا".
وتوجهت أسرة الطفل محمود محمد حمدي عبد الشافي إلى مستشفى الموظفين بأرض اللواء، وقام أحد الأطباء بتنظيف الجروح للطفل، ونصحهم بالتوجه إلى طبيب للخياطة، لأن الجرح خطير ويمكن أن يحدث شلل بيد الطفل إذا وصلت الجروح للأوردة.
وتضيف عمة الطفل: "كان فيه دكتورة اسمها لمياء خيطت الجروح للولد ورفضت تديني تقرير ورفضت حتى إنها تقول الولد فيه كام غرزة وقعدت تقولي لما تبقي تعملي محضر ابقي اقولك، ولما زعقت فيها أوى قولتلها ده ابنى وحقي اعرف قالتلي نحو ٦ جروح قطعية وفوق الـ ٢٥ غرزة".
واختتمت رانيا حديثها قائلة: "احاسب مين وأجيب حقه من مين ومين المسئول عن السلم ده.. حسبي الله ونعم الوكيل في المسئولين عن دائرة أرض اللواء".
