الدولرة..وحكومة الأفورة
سمعت آخر نكته؟ بيقولك الحكومة أصدرت قرار تقنين أوضاع تحويل الدولار من الخارج إلى الداخل "يا حلاوة".
كلنا فى عرض دولار واحد وحكومة الأفورة.. خايفة من غسل الأموال أصلها بتخالف شرع الله..آه ما الصكوك الإسلامية بتؤيد شرع الله "يا حلاوة".
يعنى علشان احتمال 1% دخول أموال بغرض غسلها فى مصر نحرم نفسنا من الدولار.. شوفت الأفورة.. دى حكومة فقدت السيطرة.. وكل قراراتها جايبانا لوره.. حرام عليكم حالتنا بقت متدحدرة.
يعنى حكومة الأفورة..سابت السمسار..واتشطرت على وارد الدولار..شوفت سياسة الانحدار.
الدولرة.. يا حكومة الأفورة.. يعنى تحويل الودائع من الجنيه للدولار.. وده اللى حاصل يا شطار.. والمستثمر علشان يحافظ على ثروته حول كمان بالدولار وباع للموزع بالدولار..اللى باع للتجار برده بالدولار.. وعلشان مفيش حد أنصح من حد هو كمان مش هياخد من المواطن ثمن البضاعة إلا بالدولار.
تخلص كده حكاية الدولرة..لا لسه أكتر من مرحلة.. تقوم من نومك تلاقى ابنك بيطلب مصروفه بالدولار.. وتشترى الفول والطعمية بالدولار.. ولما تروح الشغل تلاقى عم لطفى بتاع البوفيه يحاسبك على الفطار برده بالدولار.. والله مش هزار.. علشان الجنيه انهار أمام الدولار.. وبكده الأزمة بقت متدبلرة..هى دى الدولرة ياحكومة الأفورة..عرفتم ليه قرارتكم مسخرة..لأن بلدنا حالتها متدهورة.. وجيوبنا مأشفرة..علشان كده هايقلبهالكم الشعب دندرة.. ويخلصنا من الأنعرة.. بثورة متكررة مش متعكرة..وبلدنا منكم تبقى متحررة.
