حفظ قرآن وكورسات ورياضة وسباحة.. برنامج أولياء الأمور خلال إجازة الصيف
أعلن اتحاد أمهات مصر للنهوض بالتعليم عن خريطة وبرنامج أولياء أمور طلاب المرحلتين الابتدائية والإعدادية خلال الإجازة الصيفية.
وقالت عبير أحمد مؤسس اتحاد أمهات مصر للنهوض بالتعليم، إن أولياء الأمور قرروا عمل برنامج صيفي لأبنائهم الطلاب بعد المجهود الذي بذلوه خلال العام الدراسي المنتهي، حيث قرر عدد كبير من أولياء الأمور التركيز على تحفيظ القرآن الكريم والحصول على كورس رسم وباليه وجمباز، إضافة إلى زيارة مكتبة مصر العامة.
وأضافت عبير أن هناك أنشطة أخرى مثل قراءة القصص وممارسة رياضة كرة القدم، والمشاركة في النادي الصيفي التابع للمدرسة، حيث به أنشطة رياضية وتعليمية ورسم وحفظ قرآن وتدبير منزلي وأشغال فنية، فيما رأى ولي أمر أن الإجازة قصيرة بالمقارنة بطول السنة الدراسية ولكن سنقضيها في كرة القدم والساحل الشمالي.
بينما قرر البعض الآخر استغلال الإجازة الصيفية في ممارسة السباحة إضافة إلى كورسات إنجليزي وفرنساوي، وقرر آخرون الاشتراك في المراكز الاستكشافية التابعة لوزارة التربية والتعليم التي تتضمن أنشطة عديدة مثل الرسم والروبوت وأنشطة تعليمية أخرى.
وقال أحد أولياء الأمور: "مطلوب سواء للأولاد الأسر اللى تعبت كتير جدا الفترة اللى فاتت، من بعد إجازة العيد الصغير لو كل أسبوع نكتب موضوعا واحدا بس تعبير هتلاحظوا الفرق جدا السنة الجاية إن شاء الله، وحمل هم كبير هتكونوا فعلا حليتوا مشكلته ازاى نكتب موضوع تعبير بشكل جيد، والأولاد بلاش نسيبهم طول الاجازه لعب بس وموبايلات وتابلت وتليفزيون، وكل أسرة تحاول تشوف حد كويس يحفظ أولاده قرآن أو في أي مسجد ده هيظبط لسان الأولاد جدا وكمان مش هيخلى عضلة المخ تسترخى اكتر من اللازم يعنى شيء بسيط من النشاط الذهنى ولو ساعة أو اكتر شويه كل أسبوع، يا سلام لو كل أم تخلى بنتها تشارك شويه في أعمال البيت أولا انتى هترتاحى شويه وفى نفس الوقت البنت من صغرها لازم تتعلم اللى يناسب سنها، ولو ولد برده يعمل اللى ممكن يقدر يعمله مشاركة في أمور البيت وكل أسرة طبعا عارفه كويس إمكانيات كل ولد وبنت من أفراد الأسرة".
وتابع: "بلاش وحذارى من السهر لغاية الصبح كل يوم والأولاد يصحوا بعد العصر، قلبنا الليل نهار والنهار ليل، كده المخ والساعة البيولوجية بتتلخبط تماما، نسهر شويه اه احنا في اجازه وننام شويه برده كويس بس مش طول النهار يعنى لو نشوف أي نشاط رياضى الأولاد والبنات يقدروا يعملوه يبقى هايل، لو حد عنده الاستعداد والرغبة يشترك لأولاده في أي سنتر تعليم لغه انجليزيه جميل جدا طبعا، المهم نستغل الإجازة بشكل أو بآخر حسب إمكانيات كل أسرة".
