نشطاء يسخرون من غرق «التجمع الخامس» بسبب الأمطار.. فوزي: «رحتوا إسكندرية امتى؟».. لؤي: «مسمينه تجمع علشان الميه بتتجمع في الشوارع».. عمرو: «يا ريت يوزعوا عوامات على
تصدر هاشتاج "التجمع الخامس" ترند مصر على "تويتر"، بعد أن تعرضت القاهرة الجديدة للغرق نتيجة سقوط الأمطار بغزارة خلال اليومين الماضيين، نشطاء مواقع التواصل الاجتماعي "فيس بوك وتويتر" سخروا من غرق المنطقة، مازحين أن التجمع سُمي بهذا الاسم لتجمع المياه فيها، خاصة في شارع التسعين الذي يبلغ ارتفاع المياه به 90 سنتيمترا.
تجمع المياه
قال حسام الدين علي: "الكوارث ممكن تحصل بس ساعتين مطر مش كارثة في القرن الـ٢١.. أكتر حاجة معكنناني أن كل البلاعات بناكلها وإحنا سايقين دي طلعت منظر ولزوم الديكور.. #التجمع_الخامس".
وأضاف فوزي عدوي "أنتوا روحتوا إسكندرية امتى #التجمع_الخامس".
وسخر لؤي عمران "اللي مش عاجبه البنية التحتية في التجمع أحب أوضح الآتي: الحكومة ما ضحكتش على حد هما مسمينه تجمع علشان الميه بتتجمع في الشوارع، خصوصًا شارع التسعين، وهو اتصمم أن الميه يوصل ارتفاعها 90 سم ودا أصل التسمية، كل شيء محسوب يا فندم بدقة كفاية ظلم".
وعلق عمرو محسن سلامة "#التجمع_الخامس.. ياريت يناقشوا فكرة أنهم يوزعوا عوامات نفخ على بطاقات التموين مع السلع الغذائية على شكل البطة والسمكة كي يستطع المواطن التنقل بحرية في شوارع المحروسة في مثل هذه الظروف والظروف المشابهة والله الموفق والمستعان".
ورد أحمد عبده "للبيع لدواعي السفر فيلا في #التجمع_الخامس ترى البحر مباشرة الوسطاء يمتنعون".
ما بتعرفوش تعوموا
وقال خالد صبري "#مصر #القاهرة_الجديدة تغرق في بحيرة الفساد.. وكالعادة الحلول ستكون بمجهودات السكان الشخصية، ثم تطبق عليهم غرامات بسبب مخالفات الحلول العشوائية.. خراب ديار وخراب ديار".
وأضاف سمراء النيل "وإن سألوك عن السيول في #التجمع_الخامس... قل لهم الحمد لله المسئولين كانوا فاكرينها مش تبع مصر".
وعلق عماد ناشد "طيب يا جماعة ممكن بعد اللي حصل في #القاهره و#التجمع_الخامس ممكن بس نأجل موضوع المحطة النووية في الضبعة شوية. أصل مش هينفع بجد".
ورد جوبا "#التجمع_الخامس التجمع حلو انتوا اللي ما تعرفوش تعوموا!!".
نزرع رز
وسخر محمد المسيري "#التجمع_الخامس وده حال التجمع بعد ما غرقت بسبب شوية أمطار لو حالك أحسن من حالهم وساكن في منطقة شعبية أو حتى عشوائية أحمد ربنا أنك ما رمتش فلوسك في الأرض".
وقال جناب الكومندا المهم "طيب ما نزرع رز في #التجمع_الخامس يا معلم".
وردت مريم سمير "اللي نازل من التجمع للمعادي يخلي باله من الشعب المرجانية اللي في أول التسعين #التجمع_الخامس".
وعلقت فاطمة فرويلة "عارفة يا حورية أهو سكان التجمع دول طول الصيف هارينا لايف من الساحل.. السنة دي بقى الساحل هو اللي راحلهم #التجمع_الخامس.. الو..الحلوانى اللي بنى مصر من فضلك اعملنا واحدة تانية عشان دي باشت".
وتابع مصطفى راضي "مكناش عايزين اللي بنى مصر يكون حلواني كنا عايزينه يكون حداد عشان تستحمل شوية #التجمع_الخامس #القاهره_الجديده".
وسخر عمر خالد "#التجمع_الخامس في مصر مش محتاج تروح مصيف... هنجيبلك البحر لحد باب بيتك....حرفيًا".
وقال محسن محمد "#التجمع_الخامس عاجل: وزير السياحة يصدر قرارا بمنع السيدات من التجول في التجمع الخامس بالمايوه الشرعي ويؤكد على وجوب الالتزام بالمايوه التقليدي حفاظا على المظهر الحضاري للمنطقة".
