أحضنوا أمهاتكم قبل الممات

أمي الحبيبة النهاردة خلاص خلص عزاك، شوفتي يا أمي اللي حصل قبل ما يفتحوا باب المغسلة علشان تخرجي، نزل المطر ما فهمتش السبب إحنا في وقت ما بينزلش فيه المطر، لكن لما دخلت وشفت وشك عرفت السبب، قالولي اهمس في ودنها قولها وادعيلها، ولما قربت منك ما دعلتكيش، طلبت منك تدعيلي، دا انت العروسة اللي طالعة للسما، واحنا بنصلي عليك كنت ببكي واحنا بندفنك كنت ببكي..

اللي يقولي شد حيلك واللي يقولي ليه بتبكي خليك رجل.هي رجولتي يا أمي هتنتقص لما أبكي على فراقك. إن ما كنتش أبكي على بعادك هابكي على بعاد مين، هم ما يعرفوش إني لسه ما بكيتش عليكي دا البكاء يمكن ياخد سنين، دي الذكريات كتير، والحنين للذكريات بيوجع..

من هيشكي لأخويا ويقوله شوفت أخوك ليه كام يوم ما سألش عليا، ولما أجيلك واعتذر تقولي يا ابني ما تعتذرش أنا عارفه ظروفك، وتدعيلي روح يا أبني ربنا يستر طريقك، ولما كنت أشكيلك وأقولك فلان ظلمني كنتي تقولي أوعي يا أبني تظلمه سيبه لربنا، كنت طول عمرك شايلة همي ولما كنت أحاول أشيل. همومك كنت بتقولي من فين جبت الكلام دا أنا يا أبني ما عنديش هموم كنت بتداري الوجع ولا مليون جدع.

أعذروني إن كنت النهاردة بكتب علشان أمي. الحقيقة إني بكتب لنفسي يمكن يخف الوجع.