لعبة الحوت الأزرق تثير سخرية المصريين.. حمدي: الحمد لله مراتي بدأت تلعبها.. ندى: لو بدأت تلعبها دلوقت يا دوب تلحق تموت في رمضان.. محمد: الزملكاوية زمانهم وصلوا ليفل متقدم.. بدر: مفيدة جدا للستات

سخر نشطاء مصريون بمواقع التواصل الاجتماعي من لعبة الحوت الأزرق، حيث غلبت روح الدعابة على تغريدات وتدوينات المصريين على حالة الرعب التي اجتاحت العالم من تزايد عدد المنتحرين بعد تحميلهم للعبة الحوت الأزرق، التي تبدأ بأوامر يصدرها مصمم اللعبة لينفذها المقدم على صاحب اللعبة، وتنتهي بانتحار اللاعب.

تموت من الضحك
قال مصطفى نصر: "الحوت الأزرق دي كانت حاجة مأساوية والأهالي كانت هتموت من الرعب لحد ما وصلت مصر الناس بقت هتموت من الضحك".

وأضاف أبو مريم: "ألو يا بابا متخافش والله ما هنزل اللعبة يا سيدي متخافش.. يادي النيلة المنيلة أيوه يا ماما والله يا ماما ما هنزلها متقلقيش أيوه يا خالتي يا ستي والله ما هنزلها أنا مالي أنا ومال الألعاب دي أنا بخاف من خيالي أصلا #الحوت_الأزرق".

وعلق عبد الهادي: "أنت مش بائس أكتر من واحد لعب الحوت الأزرق ومأثرتش فيه"، وتابع حمدي سليم: "الحمد لله الذي بنعمته تتم الصالحات.. مراتي بدأت تلعب الحوت الأزرق".

حسن الخاتمة
وقال ندى العدل: "أنت عارف أنك لو بدأت تلعب الحوت الأزرق يا دوبك تلحق تموت في رمضان.. حسن خاتمة".

وأضاف محمود عبد المولى: "هيطلع يوسف الشريف هو الحوت الأزرق في الآخر"، وعلق أحمد الجبلاوي: "الحوت الأزرق بتاعة العيال التوتو إحنا بتوع الهيروغليفي".

ورد محمد صلاح: "محدش يلعب لعبة الحوت الأزرق يا جدعان عشان أنا لعبتها وفعلا انتحرت ومت"، وتابع أحمد أبو جندي: "صباح الخير يا أمي، عايزة أي خدمة.. يا لهوي أنت بتعلب الحوت الأزرق، هتموتنا الله يخرب بيتك".

الحوت الصغير
وسخر عامر الشريف قائلا: "بيقولك اوعي تسمع كلام الحوت الأزرق.. اسمع كلام مين بس مش لما اسمع كلام أبويا الأول.. العاق وليد الشريف ميكس مع الحوت الأزرق".

وقال محمد ثابت: "أنا لعبت الحوت الأزرق من 8 شهور ومحصلتش حاجة.. أكيد الحوت كان لسه صغير".

وأضاف بدر ستار: "لعبة اسمها الحوت الأزرق لعبة مفيدة جدا خاصة للستات بتخلي الستات جميلة وذكية في نفس الوقت والأكثر من دا كله بتساعدكم على التخسيس".

وعلقت إيمان مطر: "تم بحمد الله وتوفيقه إقناع أختي بتحميل لعبة الحوت الأزرق.. عرفت صدفة انها مخبية 50000 جنيه وأنا مفلسة والله".

وسخر بكر محمد " في يوم الـ back to ten كنا كاتبين رقم الـ group على ايدينا ف أمي شافت الرقم دا على أيدي لما روحت افتكرته حاجة تبع الحوت الأزرق راحت ندهت لبابا علشان توريلو أيدي وتعرفه أن في مشكله وأن الولد خلاص ضاع منها".

ورد أسامة أشرف: "حوت أزرق أي اللي بيطلب حاجات تخليهم ينتحروا أومال لو شوفت طلبات الستات بعد الجواز هتعملوا ايه".

وقال محمد الأسواني "الزملكاوية زمانهم وصلوا ليفل متقدم في لعبة الحوت الأزرق".