والدة زين يوسف: الورم عنيف وكبير ولسة تعبان
كشفت أسرة زين يوسف أشهر طفل مريض بالسرطان في مصر، الشهير بالطفل محارب السرطان، تفاصيل جديدة في رحلة علاجه بعد أن داهمه مرض السرطان للمرة الرابعة.
وكتبت والدة زين تدوينة على فيس بوك: «اليومين اللي فاتو كانو صعبين جدا وللاسف العملية مكنتش سهلة زي ما هم كانو مخططين، الورم عنيف وكبير وحاليا بنحاول نفهم نوعه عشان نحدد احسن الطرق السيطرة عليه. زين لسة تعبان لكننا في البيت لحد ما نقابل الدكاترة تاني بخطة علاج جديدة للأسف هيحتاج علاج واملنا أنه يقدر يستحمله ويصمد زي ما قدر تلات مرات قبل كدة. فكرة أن الورم كبر بسرعة كدة وظهر مخيفة جدا بالذات أنه مبينش أي أعراض أو وجع بس السرطان مرض لعين وخبيث ولازم نقفله بكل شكل ونبقي دايما مستعدين».
وتابعت والدته «حابة كمان احاول ارد على الرسايل والپوست اللى بتقترح نظام غذائي مختلف وفيتامينات معينة، احنا طبقنا كل ده مع زين ومش هنستسلم أن شاء الله وهنفضل نجرب وشاكرين اقتراحتكوا للاسف النوع اللي عنده أصعب وأعنف من أنه يتعالج بنظام نباتي أو عصاير بس، وشكرا لكل اللي دعا وبعتلنا كلمات تشجيع. فترة صعبة جدا بس املنا في ربنا ويقينا بيه كبير".
