والد طفلة يستغيث بمستشفى 75375: «أنقذوا بنتي بتضيع مني» (فيديو)
"وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا"، هكذا كانت رسالة والد الطفلة تمارا، الذي استغاث بمدير مستشفى ٥٧٣٥٧ لإنقاذ طفلته الرضيعة، التي تعاني ورما بجوار المخ تسبب في صعوبة تنفس طفلته.
وقال والد تمارا: "تمارا بنتي لسه مولودة من أيام قليلة، ربنا كرمني بها وكنت أسعد شخص في الدنيا لحد ما اكتشفنا المرض اللي عندها بعد ولادتها".
وأضاف: "بنتي اتولدت وربنا ابتلاها بورم بجانب المخ وللحظة حسيت إني هفقد بنتي دي، الورم مأثر على تنفُسها والدكاترة قالوا لازم تدخل حضٌانة أطفال".
وتابع: "دوخت لحد ما لقيت حضٌانة في مستشفى في الزيتون وكنت بموت كل لحظة وأنا شايف بنتي بتروح من أيدي وأنا واقف مشلول مش عارف أعمل حاجة، أقسم بالله الدموع كانت بتنزل مني وكأنها نار بتحرقني وأنا واقف ضعيف ومش عارف أعمل إيه عشان أنقذها".
وقال: "للأسف المكان اللي فيه الحضانة مفيهوش دكاترة تخصص مخ وأعصاب وناس كتير من هناك قالولي روح بها أبو الريش أو اطلع على مستشفى 57357، ووفرت عربية إسعاف مجهزة بحضٌانة أطفال جواها، وطلعت على مستشفى 57357".
وأضاف: "ولأن العدد هناك كبير ومهول استنيت لحد ما دوري جه وكنت آخر شخص في المكان، جه دوري ودخلت للدكتور لقيته بيقولي عايز إيه قلت له يا دكتور بنتي عندها ورم ومأثر على نفسها وعايز أعالجها قالي امشي دلوقتي وعدي كمان يومين".
وأضاف "خرجت وأنا بكلم نفسي المهم.. ست كبيرة من عمال النظافة قالت لي عملت إيه يا ابني، حكيت لها ع اللي حصل من الدكتور، قالتلي لو مشيت وجيت في معاد تاني هتقابل دكتور تاني غيره"
وتابع: "مشيت ورجعت بالبنت للحضٌانة من تاني، وروحت في الميعاد تاني بعد يومين، لكن فعلًا كلام عاملة النظافة صح ولقيت دكتور تاني ولما حكيت له عن اللي حصل في الزيارة اللي فاتت قاللي مش هقدر أكشف عليها ولازم تستني الدكتور اللي كشف عليها أول مرة".
وقال: "أنا اداينت واستلفت عشان ثمن الحضانة اللي بنتي قاعدة فيها، بس كل ده ولا حاجة، أنا كل اللي طالبه من ربنا أن صوتي يوصل لحد مسئول جوة المستشفى بس وبنتي يكشفوا عليها كويس ويبتدوا علاجها وأشوفها بتخف قدامي، كل اللي طالبه أن بنتي تتعامل بآدمية وبس... بنتي بتروح مني".
