أخصائية تغذية علاجية: الحرنكش يقي من السرطان ومفيد لمرضى السكر والضغط

عددت الدكتورة جيهان رسلان، أخصائية التغذية العلاجية، فوائد فاكهة "الحرنكش" مؤكدة أنها تساعد الكبد في التخلص من السموم وتنقية الجسم، كما أنها تعمل على زيادة المناعة وتقلل فرص حدوث السرطان، ومفيدة لمرضى السكر والضغط والتقليل من الكوليسترول.

وكتبت جيهان رسلان تدوينة على فيس بوك قالت فيها: "الحرنكش.. حقيقي يعنى من الفاكهة اللي مش واخدة حقها خالص مع أنها عظيمة من حيث القيمة الغذائية العالية لجسمنا وكمان بسعرات حرارية قليلة جدا وده معناه أنه هيساعدنا قوى نخس لما نعمل الدايت".

وأضافت: "وعلشان كده قلت لازم أكلمكم عنها بالتفصيل.. كوب من الحرنكش المقشر (140 جرام) يحتوى 70 سعر حرارى فقط و2.6 جرام بروتين (فاكهة فيها بروتين متخيلين جماله يعنى تنفع النباتيين جدًا) + 16 جرام نشويات مع ألياف طبعًا + وغنى جدًا بفيتامين A وC وB + وكمان فيه حديد نسبة محترمة جدًا (17% من اللي المفروض تاخده يوميًا) + بوتاسيوم + كالسيوم وكمان قليل الصوديوم، بجانب أنه غنى جدًا بمضادات الأكسدة العظيمة".

وعن فوائد الحرنكش قالت جيهان: "علشان مليان مضادات أكسدة يبقى بيساعد الكبد أنه ينقي الجسم من السموم (detox) ومضاد للالتهابات وبيعلى المناعة عموما.. مفيد لعضلة القلب والأعصاب.. وكمان بيقلل فرص حدوث بعض السرطانات.. ومفيد جدًا للناس اللى بتعانى من الأنيميا (نقص الحديد) وبالتالى مهم جدًا للمرأة الحامل والمرضع.. ومفيد لمرضى السكر (يساعد في تنظيم السكر في الدم) والضغط لأنه قليل الصوديوم ومدر جيد للبول.. ولمرضى الكوليسترول المرتفع.. والنَّاس اللي عايزة بشرة جميلة وشعر صحى ونظر قوى".

وأضافت: "وكمان مفيد لصحة العظم وللناس اللي بتعانى من الروماتيزم.. وكمان علشان الـpectin fiber اللى فيه يخليه مفيد لصحة الجهاز الهضمى وينظم حركته".

وقالت: "شوفتوا بقى أد إيه عظيم ومش واخد حقه بجد احرصوا عليه كوجبة خفيفة وما تحرموش الجسم من فوائده العظيمة وخصوصا أن سعراته قليلة جدا ورخيص كمان".