مواقف طريفة لاختيار أسماء الأطفال
يحتار بعض الأباء والأمهات في اختيار أسماء أطفالهم حديثي الولادة، وقد يرتبط اختيار اسم المولود الجديد ببعض المواقف الطريفة.
تم تدشين هاشتاج عبر "فيس بوك" حول أطرف المواقف التي تعرض لها الأباء عند اختيار وتسجيل أسماء الأطفال.
- اسمي من مسلسل ليالي الحلمية
قالت نورهان: "ماما سمتني على اسم شخصية الأميرة نورهان في مسلسل ليالي الحلمية".
- انا فوزى طارق وابن عمى طارق فوزى
وأضاف فوزي:"اسمى فوزى على اسم عمى الكبير عشان اتولدت في نفس تاريخ ميلاده 23/5، فعمى حب يجامل ابويا بعدها بسنة جاب ولد سماه طارق على اسم ابويا بقيت انا فوزى طارق وابن عمى طارق فوزى".
- ابويا اتخانق مع امي عشان سونه
وقال صبري:" انا اسمي صبري وطبعا انا كاره الاسم ده حكايه الاسم يا سيدي أن امي كانت عايزه تسميني حسين عشان تقولي ي سونه زي فيلم بتاع سعاد حسني وعمر الشريف لما كانت بتقوله يا سونه امي حبيبت الاسم ابويا رفض وقال هسميه على اسم اخويا واعترضو اووي وفى الاخر اسميت صبري على اسم عمي مع أن عمي اسمه ضياء في البطاقه مش صبري".
- اخويا اسمه عبدالوهاب في مسلسل لن أعيش في جلباب أبي
وأضافت أسماء:" اخويا اسمه عبد الوهاب على اسم ابن عبد الغفور في مسلسل لن اعيش في جلباب اب يمتخافش مش هعملك منشن يا عبده".
- اسمي ميار ورحمة
وقالت ميار:" اسمي رحمه وميار عشان بابا لما راح يستلم الشغل في البنك المديرة سئلتوا انت متجوز قالها اه قالتلوا مخلف قالها مراتي حامل قالتلوا لو بنت سميها رحمه ولو ولد سميه عبدالرحمن المهم طلعت بنت وبابا قرر يسميها ذي ما المديره قالتلوا تيته تسكت لا قررت تسميني ميار على اسم بنت شافتها في التليفزيون جدو يسكت لا طبعا قرر يسميني نعمه على اسم بنت اخته طبعا وبعد صراع كبير بقا اسمي رحمه في البيت وميار في الشهاده.. #أطفال-مضررين-بسبب-اهليهم".
- اسمي جهاد وخطيبي محمد جهاد
وأضافت جهاد:" امال انا اعمل ايه اسمي جهاد محمد وخطيبي اسمه محمد جهاد ولما يزعلني اقوله في حد يزعل ابوه ولما حد يعرف يقولنا في كتب الكتاب اعملو علامه مقص وهتنحل مأساه".
- بابا وافق أن اختى تسميني عشان 10 جنيه
وقالت مامي آسر:" امى كانت هتسمينى سلوى وبابا راح يكتبنى خد اختى الكبيرة معاه قالتلوا هدفع انا ال10ج وسيبنى اسميها قالها ماشي وسمتنى الآء الاسم حلو ماشي بس أنه يسيبها كدا عشان 10ج طب افرض سمتني نفسية وهى كانت صغيرة ساعتها كنت اعمل ايه اولع في نفسي واخدكم بالحضن".
- اسمي على اسم شحات
وأضاف أحمد:" انا أمى كانت عايزه تسمينى زياد وبابا عايز يسمينى أحمد علشان في واحده معبوطه في الشارع قابلته وقالتله سميه أحمد على اسم واحد شحات بيقولو عليه راجل مبروك إسمه أحمد الفولى.. أنا ذنب اللى خلفونى إيه دلوقتى يسمونى على اسم شحات وأخويا يسموه زياد".
