كيكة الكوسة بالشيكولاتة!
(1) العنوان ليس من ابتكار العبد لله، ورغم أن الكوسة محشورة في كُل مجالات حياتنا لدرجة أنه لو عندك شراب مقطوع وحبيت تخيَّطه هتلاقي الكوسة في الإبرة، ولو حبيت تسافر بسرعة وركبت صاروخ ستجد الكوسة فيه أيضًا لتجمع -بخاطرها- المجد من أطرافه على رأي سير (والتر سكوت) على ما أذكُر، المُهم أن العنوان ليس من ابتكاري، لكنه من ابتكار برنامج على قناة "المحور" تُقدمه (أمينة شلباية)، والتي استضافت طبيب تخسيس بيرقُص وهو بيتكلِّم علشان يُقحم الحسرة في قلوبنا خصوصًا لما نشوف قناة "ماسبيرو زمان" والأطباء المُحترمين الذين يمتلك كُل واحد منهم وقارا يكفي بلدا كاملا وعشرين جيلا من المواليد، مما يجعلك تموت اذبهلالًا وانت بتسأل طيب منين جات الهيافة دي كُلها؟ أكيد من الكوسة!
(2) المُهم أن الكوسة بجلالة قدرها -محور الكلام- كانت المكوَّن رئيسي في كيكة صنعتها ضيفة البرنامج بناءً على تعليمات الدكتور واحدة ونُص، واسمها كيكة الكوسة بالشيكولاتة، وهي في الحقيقة قمة الواقعية، يا أخي بقول لَك الكوسة دخلت في الإبرة والصاروخ، فكيف تستغرب من استضافة طبيب راقص في قناة فضائية، وليه تستغرب إنها دخلت في الكيكة والشيكولاتة، إذا كانت دخلت في الطب والاحترام أصلًا؟!
(3) بعد الحلقة قرأت خبرًا عن ترشُّح (أحمد شاهين) لرئاسة الجمهورية، (شاهين) يقول إنه عالم فلكي وله نبوءات، استرجعت من الذاكرة مشكلات وخناقات مُعتادة معه على الهواء عبر أكثر من برنامج بسبب الهلس الذي يخدع به المُذيعين على الهواء مُباشرةً في برامج لا تُقدم إلا الغثاء الإعلامي، والحقيقة أن ما يُقدِّمه (شاهين) مع مُستضيفيه لا يقل عن الكيكة بالكوسة والشيكولاتة مضروب عليهم بيضتين!
(4) أما الكابتن (عزمي مجاهد) فيستضيف دائمًا شخصا اسمه (خالد رفعت)، و(خالد) يكره التسعين مليون مواطن مصري، والتلتميت ربعميت مليون مواطن عربي، والمليار أو اثنين مواطن مسلم، والميت مليار مواطن أو ميتين مليار حول العالم، ويحفظ السيرة الذاتية لكُلٍ منهم من أول تاريخ ميلاده لحد عدد شعر لا مؤاخذة شنبه سواء كان ذكرًا أو أنثى، ويفتي في كُل العلوم، فيزياء كيمياء أحياء، طب هندسة صيدلة، مُطالعة جبر هندسة، دين إسلامي مسيحي يهودي عبدة النار والبقر، بيتكلم بإسهاب في جوزة الطيب وجوزة الهند وجوزة المعسل، وبالتأكيد لما بتتفرَّج عليه برضو ـ خصوصًا مع كابتن (عزمي) الإعلامي الذي لا يشق له غبار علشان الغبار بيخاف منه ـ بتحس إنك بتشوف كيكة الكوسة بالشيكولاتة لكن مش عليها بيضتين لأ، دي مزرعة بيض كاملة!
(5) وبالعودة للأخ (شاهين) صاحب النبوءات وأبيَّن زين وأوشوش الودع، ألم يتنبأ لنفسه أنه لن ينجح لأنه أصلًا لن يخوض الانتخابات بسبب فشله في تجميع أكثر من توكيل واحد هو التوكيل اللي هيعمله حضرته لحضرته علشان تكون الدولة فعلًا هي المستفيدة بسبب رسوم استخراج التوكيل؟ طيب ياريته يسأل الأستاذ (خالد) وهو يقول له إنه هيسقط فياخُدها من قصيرها ويوفَّر على نفسه وعلينا البيض ده كُله!
(6) ومن دلالات الكوسة ومعاها القرع، أن تجد مُذيعا يُقدِّم برنامجًا يمتد لساعتين تلاتة على قناة تجارية بيدفع فيها ليظهر في برنامجه، وبيدفع للضيوف علشان يشاركوه، وبيدفع للمشاهدين علشان يتصلوا بيه، المُشكلة أن حضرته عامل البرنامج باسمه (ملعب الشريف)، ولو بيتكلم في الكورة فعادي لأن أي حد ممُكن يتكلم في الكورة، لكن أن يقوم بالتعليق على أعياد المسيحيين بمنتهى الجهل، وهو يؤكد أن الاحتفال يتم بعيد الميلاد الجديد (بدلًا من عيد الميلاد المجيد)، وبحضور بطريق الكنيسة (بدلًا من بطريرك) فهي كارثة وبلوة مسيَّحة أو بالأحرى -ـوحسب السياق- فهي صلصة على كوسة مسبِّكه، خصوصًا وأنه لا حَد سأل، ولا حَد راجع، ولا حَد عاقب، ولا حَد عدَّى ولا مرَّة هدَّى وشاف برامجه إلا وقال هاتوا حتَّة من صينية الكوسة.. وظلموا الصينية يا عيني!
(7) بالمُناسبة.. لا أكره (خالد رفعت) كما يكرهني ويكره الجميع، وسيسألني واحد سؤالًا ـ على طريقة كابتن (لطيف) الله يرحمه ـ ويقول لي هو (خالد) يعرفَك؟ وسأحيل السائل للفقرة الرابعة، قُلت لحضرتك إنه يعرف كُل سكان العالم ويحفظ سيرتهم الذاتية عن ظهر قلب، ويكرههم جميعًا عملًا بالمثل اللي بيقول تعرف فلان؟ أيوه.. عاشرته؟ لأ.. يبقى متعرفوش.. وهُنا دعنا نتوقَّف للتأكيد أن (خالد) أكيد عاشرهم كُلهم وعرفهم كُلهم علشان كدة كرههم كُلهم.. المُهم أقول إنني لا أكرهه ولا أحبه، لكن تُدهشني قدرته الخارقة تلك على الحفظ كأنه أرشيف محكمة جنايات الجيزة، مدموجًا بالسجل المدني ليوغوسلافيا قبل تقسيمها، ومكتبة (تشي يونج شي حا) اللي فاتحة أمام كُلية آداب جامعة بكين وبتبيع مذكرات للطلبة فيها أسئلة الامتحان قبل كُل تيرم، طبعًا حضرتك متعرفش المكتبة ولا صاحبها، لكن هو عارفه وبكره يحكي لك حكايته مع الراجل، وحكايته مع الزمان، أومال إنت عايزه يطلع يقول إيه في البرنامج بعد كيكة الكوسة بالشيكولاتة؟ وعمومًا لو مش عاجب حضرتك فمُمكن تيجي أعزمَك نشرب سوا من البحر!
