"البنت اللى بتشوف الملايكة".. شعر وفاء بغدادى
البنت اللى بتشوف الملايكة
بتحب اسم البحر يطلع فى القصيدة
تشبك اديه شمس الحروف
ف السطر يضحك أو يعيط مش مهم
السطر يضعف ولا يقوى
بس ينطق بالحقيقة
البنت اللى بتشوف الملايكة
عينها بتخاف الحقيقة
تكره قصايد فاتحة شباك الوجع للناس
وتحبها لما
تجر همومها براها
البنت تايهه
اكمن جن الخوف بيتحدى الملايكة
والملايكة طيبين
والخوف كبير أكبر من البحر بكتير
والبحر يصغر
والخوف بيكبر والسطر يضعف
والجن يقوى
والملايكة لسه برضه طيبين
والبنت مش عايزة الحقيقة
تقلع عنيها ومن ساعتها
مبقتش بتشوف الملايكة
