طلاب عن مقترح توحيد الزي الجامعي: «أحسن من البنطلونات المقطعة»
سادت حالة من الجدل بين طلاب الجامعات، بعد اقتراح النائب عبدالكريم زكريا، بتوحيد زي الجامعات، كعامل مهم لعدم التفريق بين الطلاب، لافتا إلى أن كل كلية يكون لها زي واحد، ومعروف في الجامعات، موضحا أنه قد سبق في دور الانعقاد الماضي أنه تحدث عن المقترح لكنه فهم خطأ.
وفى هذا السياق، سألت «فيتو» الطلاب عن آرائهم في هذا المقترح، وجاءت الردود كالتالى:
قالت هدى :«ياريت عشان محدش يحس إن حد لابس أحسن منه»، وأضاف خالد :«ياريت على الأقل أحسن من الكرنفال والتنافس بالموضة والبنطلونات المقطعة»
بينما اعترض محمد قائلا :«يعنى البرلمانيين حلوا مشكلات الناس كلها ولسه بقى عاوزين يوحدوا الزي، لا والله بجد الناس دي بتتعب».
وأضافت مها: «دى سبوبة اللى فكر فيها عاوز ياكل من وراها عيش، كانت المدارس الابتدائية على مستوى الجمهورية بتلبس زى موحد راح مخترع فيها، وقال لك كل مدرسة تلبس الزى اللى هي عايزاه، جاى يجربها في الجامعة بس بشكل تانى لله الأمر من قبل ومن بعد».
وتابع أحمد :«يا ريت يتوحد على كل الكليات علشان البهرجة اللى بنشوفها هما بيتعلموا ولا رايحين حفلة»، وتابعت هناء: «ياريت والله دا حتى يبقى أحسن من المولد اللى في الجامعات ده».
