المُزّة ما تعملش كدة (حلقة 5)
لو ربنا كارمك يعنى أوى وجايبة حتة عربية زقزوقة صغيرة واتعلمتى السواقة بعد ما كسرتى 3 عربيات، ويادوب لسة ما بقالكيش شهرين تلاتة راكبة عربيتك الصفراء فى فستقى الجديدة.
ولقيتى واحد بيحاول يغلس عليكى ويعاكسك وانتى سايقة، وانتى كل اللى هامك إنه ما يخبطش العربية، وهو عمّال يديها غرز ومنحنيات وبيتشقلب على الطريق.. تتخضى؟ وتتكعبلى؟ وتدوسى فرامل وتلبّسى صف كامل فى بعضه، ومش بعيد عربيتك تتعور وتحتاج كونسلتو.. لأن المزة ما تعملش كدة.
أقولك أنا بقى يا مزة تعملى إيه .. لما يغمزلك ويشاورلك اعملى إنك موافقة.. طبعا البيه هيركن على جمب عشان تركنى وتتعرفوا.. جهّزى فى غيدك شوية دبابيس طرحة أو شعر، وعدّى من جمب عربيته وكإنك هتركنى أُدامه.
هتلاقيه ببيبص لنفسه بصة إعجاب أوى.. ارمى الدبابيس أدام عربيته وانتى على الرابع وطيران ومن أول مفرق "والجرى نص الجدعنة".
وإوعى يحصّلك عشان ما يكسركيش.. هى المزة تعمل كدة.
