«من دون خجل أو خوف» قصيدة لـ«أشرف عبد العزيز»

من دون خجل أو خوف
أنا قلبي ليك ملهوف
داري ف جمالك داري
خليتي الأعمى يشوف
وبقيت على بابك مسكين

وف حضرة العشاق
عملت حبك غار وفضلت أتعبد
من حسنك أتوضى
على طيفك أتوحد
والتوبه كانت دمع العين

كانت سمايا غيوم ف غيوم
وهجرني لمت ف بعده اللوم
كروان ف سما أحلامي يحوم
تناديني أعدي بحورك عوم
واخلي عشقي لقلبك دين

وحياة الحب اللي جمعنا
طريق ومشيته مشيني سنين
اخترت الهجر اللي وجعنا
شايل جوايا الذكرى حنين
رجعنا لقلبك رجعنا
أنا والذكرى دا البعد أنين

ومابين أصوات الدقه ف قلبي
وصدى أناته عبير بيخبي
وجرحه ف جرحي
وصوت الدمعه حزين

على فين وخداني الدنيا معاك !
هتاخدني الدنيا معاك على فين !
لجراح بعديها جراح، موعود
القلب معاك ف سنين الهجر
يتاخد غدر، هيجيني الفرح منين !

هتآمني لحبك يوم مع واحد
كالعاده بيحصل عادي
ويكون بيخلص جرح قديم
وتكوني ضحيه وترجعي تاني
تعيدي حسابك هتلاقي حنين
من دون خجل أو خوف
أنا قلبي ليك ملهوف
مستني يطلع حبه من قلبك جنين