بالصور.. اللحظات الأخيرة في حياة الطالبين الغارقين بـ«علوم حلوان»
روى مازن معتز، الطالب بالفرقة الثانية بكلية العلوم جامعة حلوان، زميل الطالبين الغارقين بمعسكر الجامعة بمرسى مطروح، آخر لحظات الطالبين قبل غرقهما، قائلًا: "رحنا ثلاثة رجعنا واحد، يوم الأحد 27 أغسطس 2017 هو تاريخ وفاة 2 أصحابي غاليين عندي جدا قدامي، ومعرفناش ننقذهم من الغرق".
أضاف معتز: "الصور دي قبل الوفاة بـ 10 دقائق، الاتنين صلو الفجر جماعة وناموا صحيو فطرو راحو البحر علشان ربنا كاتبلهم معادهم والحمد لله كانوا مصلين الفجر وأحمد خالد كان صايم اليوم إلى قبله والاتنين من أطيب وأجدع الناس".
وتابع قائلًا: "إلى حصل كنا في شاطئ الأبيض في مرسى مطروح تبع الجامعة ونزلنا الماية بس أنا قصير فمرضتش ادخل جوة بحكم طولي فشوية وزهقت بدري لاني واقف لوحدي وطلعت، هما كانو لوحدهم لحد ما الموج فضل يحرك فيهم ووصلو جمب باقي الناس، ومكنوش فالغريق ولا حاجة، وقريبين من الناس وكل مالناس يشوفوهم يقولوا بيلعبو وأنا متابعهم برا بالكاميرا".
وأضاف قائلًا: "وشوية وناس من اللي معانا في نفس الشاليه طلعت فا اتكلمت معاهم وملحقتش 3 دقائق ولقيت ناس كتير بتجري وشايلين أحمد خالد وهو بيطلع دم من بوقه بس مش دم آثار خبطة لا ده باين أنه من اثار بلع ماية وأدت لحاجة جوة جسمه بس كان بيحاول ياخد نفسه والناس بتضغط على صدره تحاول تلحقه وإلى يعملوا تنفس صناعي، في الوقت إلى الناس شايلة أحمد خالد ببص اقول فين أحمد محسن ليه مش هو اللي شايله ببص كويس لاقتهم مطلعينه هو كمان".
