بالصور.. أطرف مواقف العيد مع الأضاحي.. أمنية: العجل جري ورانا عشان لابسين أحمر.. مرح: لقيت العجل في حضنى.. شروق: الجزار لم عدته وهرب من الخوف.. وسلمى: فلت وجري لغاية المريوطية

تضم احتفالات عيد الأضحى أطرف المواقف التي تبدأ باكرًا بسبب الأضاحى التي يتسبب بعضها في فوضى عارمة في الشوارع وتصبح مشاهد هذا اليوم ذكرى مضحكة لدى الكثيرين.

روى رواد موقع التواصل الاجتماعى "فيس بوك" أطرف مواقفهم بعيد الأضحى عبر صفحة الكومنت الجاحد ومن بينها:-

- العجل جري ورانا
كتبت أمنية معلقة: "كنت في سنة ستة ابتدائي ولابسة أنا وبنت عمتى ترنجات حمراء، وكان العجل هيدبح وشافنا وطلع يجرى ورانا علشان لابسين أحمر، وأنا كل اللى طالع عليا وأنا بجرى الله وأنا مالى يا لمبى".

- الخروف رجع في كلامه
كتب أبانوب: "ماشي أنا وواحد صاحبي كان في واحد ماسك الخروف والجزار راح يجيب السكينة أو يسنها، الخروف لف لفتين في الهوا وفك وجري ورا الجزار شقلبه، وبعدها لقيته جاي علينا وقفنا من الخضة مش عارفين نعمل ايه، والشارع مقفول ناس بتتفرج، جه لحد عندنا راح واقف ولافف تاني ناحية الشارع، صاحبي بقي كان بنطلونه مبلول سعتها".

- لقيت العجل في حضنى
وقالت مرح: " أنا معرفش إيه اللي حصل بس فجأة لقيت العجل ف حضني".

- الجزار لم عدته وهرب من العجل
وذكرت شروق: "في عيد الأضحى اللي فات جبنا عجل بس كان هايج، وجايين يضربوه عشان يقع راح جري منهم وكله جري وراه واللي كان حافي واللي كان بكلسون، والجزار لم عدته ومشي واشتغل يقول إحنا متفقناش ع كدا، والشارع كله يجري وراه بس جبناه الحمد لله ودبحناه، المشكلة فبعد كدا بقا أي حد يشوفنا يقول أهم أصحاب العجل الهايج".

وتابعت نورهان: "بابا كان جايب البقرة في العربية الجامبو بتاعتنا، وأخويا راكب في الصندوق معاه، راح العجل مطلع رجله من الصندوق واخد وضع النط وبابا مش واخد باله، راح أخويا نط من الصندوق ووقف متشعلق في العربية من ورا ويصرخ من كتر الخوف".

- بتصور مع العجل كان هيرفسنى
وقالت سلمى: "حضرتك من 3 سنين كنا جايبين عجل، والعجل ده كان هايج جدا كنت بتصور جمبه كان هيرفسني، وبعديها طلعت عند نينة أجيب ميه أشرب، لقيت العجل فلت وطلع يجري، جرينا وراه وجبناه وربطناه، بابا بيسن السكينة عشان يدبح، قام العجل رفسه وبابا ساعتها كان خارج من المستشفي قبلها بشهرين، وفجأة العجل فلت وجري لغاية المريوطية، فاكر يا بابا".