نصر فتحي اللوزي يكتب: الحلم ومحطات الزمن
سألونى فين النوم من عنيك ؟
كتب على جفونك
حلم طاير
قلت ياناس انا الصبح مسافر
حتى تذكرة السفر
على ضهرها مكتوب
مغادر
أول محطة
خيوط الشمس كانت في انتظارك
كانت الشمس طله علينا
خيوطها كانت ضفاير
كانت زى عود الفل
في أول بشاير
طال الانتظار
صوت البلابل
كان بيعزينى في غيابك
انا لسه فاكر ؟
كان خوفى عليك
بدل طعم الحلو والسكاكر
مش عارف ليه المر
ملا الدنيا وانا في انتظارك
كان قناطير يملا هناجر
انا لسه فاكر ؟
ومحطة ورا محطة
بتلوح ايادى
اما انا
نسيت المكتوب في شهادة ميلادى
بدلته المحطات بصابر
كان وضوئى من ندى الشجر
كأنى في محرابك باحلم
والحلم طال كنت فيه
بذاكر
انا لسه فاكر ؟
كنت باحلم والحلم طال
وانت تحت الجفون
ودموعى بقت صخرة من اعالى
الجبال
بين أسنان الزمن
كسارة المحاجر
واصوات كتير بتنادى
خليك وبلاش تهاجر
انا لسه فاكر
انا ابدا مانسيت خمرية الصبح بدرى
بتعزف غنوة فوق المزاهر
بتحكى حكاية قلب
نظراتها لروحى كانت مباخر
حاضنة خيوط الشمس
بجدايل الضفاير
اسأليه هو لسه فاكر ؟
مكتوب على تذكرة السفر
دق جرس الوصول
والشعر الأبيض
بين طياته حلم عنوانه
انا في انتظارك
وانا لسه فاكر
