المُزة ما تعملش كدة (حلقة 3)
لو صارفة دم قلبك واعدتي يجي 3 شهور تحوشي وتوفري من ثمن الطماطم والبطاطس والكوسة عشان تجيبي طقم اكسسوار صيني شبه اللي كانت لابساه فاطمة في المسلسل التركي اياه واخيرا قدرتي تشتريه وبتفكري تلبسيه بقي في يوم..
وكل ما تقولي لجوزك تعالي نخرج نتفسح يقولك انا اشتريت بطيخة مرملة و5 كيلو برتقال وربع كيلو لب عشان نسهر نتفرج علي مسرحية ليلة ابليس يوم الخميس انا جاي ومالهوش لازمة الخروج والتكاليف.
تيجي تلبسيه في البيت يقولك .. شيلي العقد الغالي ده لما نروح عند " ماما " أو الحلق بتاعك بيلمع في عيني وبيعميها ومش شايف
.. تقومي قالعة الحلق ورامياه في وشه ..لا المزة ما تعملش كدة.
تعالي بقي انا اقولك المزة تعمل ايه .. المزة تلبس احلي فستان عندها وتحطي اغلي برفان اشترتيه من محل دلع الستات ابو اتنين ونص وتلبسي العقد الجديد وتستنيه اول ما يرجع من الشغل .. يقولك حضريلي الغدا تقوليله ما عندناش .. طب اعمليلي كوباية شاي علي ما تجهزيه .. تردي بكل ألاطة .. ما كانش يتعز.
يبصلك ويقولك انتي لابسة كدة ورايحة علي فين .. تردي بكل حب طالعة اساعد ام محمد جارتنا اصل بنتها بتتخطب ولازم ابقي جمب العروسة ..ولابسة كدة عشان ابقي منورة جمب العروسة .. مرارته هتتفقع وانتي تلبسي الطقم اللي عاجبك ولو نزلتي لفيتي حوالين البيت سبع لفات ورجعتي ..هيتقهر .. فهمتي يا مزة ؟!!
