بالفيديو.. شيرين لـ«إيهاب توفيق»: «خليك في حالك»
قالت المطربة شيرين عبد الوهاب في مداخلة هاتفية مع الإعلامي عمرو أديب في برنامج «كل يوم» المذاع على فضائية «أون إي»: «أنا ست فاض بيا الكيل علشان كده بتكلم من قلبي وطالعة معاك النهاردة علشان أقول أنا ست حرة وإللي عندي ليا حاجة يجي يقف قدامي ويتكلم».
وأضافت شيرين: «أنا ولا بغلط في بلد ولا فنان.. إنما يطلع إيهاب توفيق عندك يا عمرو ويقول أنا زهقت.. أنت مالك يا إيهاب خليك في حالك هو حد جاب سيرتك.. هو أنت تعرف إللي حصل في فرح عمرو يوسف وكندا علوش.. أنت متعرفش حاجه يا إيهاب ولا حد يعرف حاجة».
وقاطعها عمرو أديب قائلًا: «طيب قولي لنا إيه إللي حصل»، وردت شيرين: «إللي حصل إن أنا كنت قاعدة أنا وأصالة على ترابيزة واحدة وفجأة قالوا لنا إللي هايحي الفرح تامر حسني وحماقي.. وطبعًا أنت عارف الغيرة الفنية والمداعبة فقلت إزاي تبقوا عازمين في الفرح شيرين وأصالة وتجيبوا حماقي وتامر».
وتابعت شيرين: «أنا بتكلم ولا أقصد التقليل من قدر أحد.. حماقي نجم كبير وقدره كبير عندي وطبعا تامر زميلي وابتدا معايا من بداية المشوار.. لكن فيه حد مش كويس صور الكلمتين وحماقي عاتبني وقاللي يرضيكِ كده فاضطريت أطلع أصلح الموقف وقلت إللي أنا قولته في الفرح ده.. فطلع إيهاب توفيق قالك هيه قالت مفيش حد في مصر غير حماقي وتامر ومفهمش إني بطيب بخاطر الناس إللي أنا جرحتهم دون قصد والموضوع خلص ولكني فوجئت بالكلام والأزمات إللي حصلت ديه».
يذكر أن إحدى الصحفيات كانت وجهت سؤالا لشيرين في مؤتمر صحفي قبل انطلاق حفلها في مهرجان قرطاج، حول ما إذا كانت تصريحاتها في فرح عمرو يوسف وكندة علوش "زلة لسان" أم "مقصودة"، لترد شيرين بأن تصريحاتها مقصودة لفنان بعينه كان أساء لها من قبل وهي أرادت أن ترد هذه الإساءة أمام الجميع، في إشارة منها إلى عمرو دياب.
