طلاب «تجارة عين شمس» يشتكون من نتائج التكاليف والمحاسبة الضريبية

سيطرت حالة من الغضب على طلاب قسم المحاسبة الفرقة الرابعة بكلية التجارة بجامعة عين شمس بسبب رسوب معظمهم في مادتي "محاسبة التكاليف - المحاسبة الضريبية".

وقالت إحدى الطالبات: "النتيجة ظهرت ومعظمنا سقط محاسبة تكاليف ومحاسبة ضريبية، والتصحيح أصلا كان عشوائى لأن كل الدفعة جايبة نفس الدرجة محاسبة تكاليف 2 من 20 محاسبة ضريبية 4 من 20".

وأضافت أخرى : "المحاسبة معروفة إننا بناخد درجات أي خطوة بتعملها فلما تلاقي 2 و4 في مادتين محاسبة يبقي مكناش روحنا الامتحان أصلا ".

وقال أحد طلاب الفرقة الرابعة: "اتجمعنا عند مكتب العميد عشان نشتكى قالنا عندكم الالتماس قدموه ولو مش عاجبكم أقيموا دعوى قضائية ومفيش حاجة اسمها إعادة تصحيح".

وتابع الطالب: "قررنا نجمع أسماء ونشوف حد يرفع قضية حتى لو إحنا مخدناش حاجة، وكان فيه عدد كبير قوي أمام الباب الرئيسي لكلية تجارة راح العميد الجديد نبه على الأمن يقفل جميع البوابات ومحدش يدخل إلا الساعة 2 وأي حد عاوز يدخل يقولولهم النهاردة إجازة عشان محدش يدخل".