نتيجة الثانوية العامة تثير سخرية النشطاء.. أمير عيد: جبت 54%.. أحمد: المجاميع في بلدنا درجات حرارة.. محمد: ابن عمتي كان 53% ودلوقتي بقى أعظم تاجر.. ومصطفى: أمي صحتني واكتشفت أني في الجامعة

وأضاف جاست داي:«صاحبتى ابنها في ثانوية عامة شوفنا النتيجة برقم جلوس غلط كان53%.. قولنا مش حنقولها.. جت تقولنا الرقم اللى معانا غلط والنتيجة الصح 91%.. والله عيط».

وقع قلبنا
وعلق سكوربي:«دخل علينا البيت بيزعق ويقول فرحانين على إيه ده فاشل وهيعيد ثانوية عامة، خلانا رحنا شفناها تاني بس طلع هو شافها غلط بعد ما وقع قلبنا كلنا».

ورد حساب باسم رفاعة الطهطاوي قائلا: «ثانوية عامة ١٩٨٦. ٩٥٪. رياضة. كلية هندسة ١٩٩٧. الأول على دفعتي. اعمل بتصميم الطائرات في أمريكا. شاركت بتصميم ورأست تصاميم معظمهم».

الخوف
وقال زيما محمد:«كل اللى فاكره بخصوص ثانوية عامة أن أمى كانت حاطه أمل على أن أختى تجيب أعلى منى وتدخل طب مثلا بس أنا خيبت ظنها ودخلت صيدلة وأختى دخلت بيطرى».

وعلق مصطفى رشدي: «أمي صحتني علشان الثانوية العامة ظهرت، وبعد ما صحيت بنص ساعة وفقت اكتشفت أن لا أنا ولا أخواتي في ثانوية عامة عشان تعمل كدا».

ثانوية عامة مش النهاية
وأضاف محمد رضا:«أنت فشلت في النجاح من أفشل نظام دراسي، ثانوية عامة مش النهاية، أنا ابن عمتي كان جايب 53%، ودلوقتي بقي أعظم تاجر في المنطقة».

وتابع أحمد المرسي:«المجاميع في بلدنا تحسها درجات حرارة مش مجاميع ثانوية عامة، لدرجة أن الخامس ع المدرسة مثلا جايب بتاع 90 ف المية، وربنا يكون ف عون أهاليهم».

تجربة صعبة
وقالت كريستين عاطف: «في نفس الوقت دا كده لما نتيجتي ظهرت كنت مسافره ومش في البيت، وكان معايا بنات كتير ثانوية عامة، برضو لما ظهرت لقيت اللى بتصوت واللي بتقع من طولها واللي بتنهار وأهلها معاها عالتليفون، بس أنا وكام واحدة تانين اللى كنا بنهدي فيهم مع أننا كنا جايبين في السبعينات، آه كنت مصدومة بس كنت متماسكة عشان الباقى وبقول في سري جملة واحدة "ليه كده بس ماشي الحمد لله" بعد فترة لما التنسيق نزل ودخلت تجارة جامعة حلوان وأنا لسه بقول "الحمد لله بس ليه كده" في نفس الوقت لقيت إن عندي مساحة بشعة من الوقت إني أذاكر أو أرسم أو أمارس الحاجات إلى بحبها ووجودى في جامعة اه مش جميله بس مدياني وقت أعمل فيه حاجات كتير جمب الدراسة فا "الحمدلله بس دلوقتي مفيش ليه كده" استنوا يا جماعة شوية وشوفوا ربنا عايز يقول ايه».


شايل مادتين
وأضاف أحمد هشام:«عمتي هي اللي جابتلي نتيجة ثانوية عامة، اديتني أول تلات مواد وقفلت السكة حبيبتي مرضيتش تصدمني إني شايل مادتين.. ثانوية عامة».

وعلق طيب موكا: «بقالي ساعة بحاول أخلي ماما متبقاش متوترة على النتيجة مع العلم أن أختي خلصت كلية وأنا في تانية كلية ومفيش أي حد في العيلة في ثانوية عامة».