المصريون يتذكرون الماضي في «فاكر لما كان».. خالد: أجدع ساندويتش طعمية بربع جنيه.. ديد: كيس الشيبسي بـ50 قرشا.. محمد: من 15 سنة 6 جنيهات تجيب فرخة وخضار.. عائشة: جرام الذهب كان بـ45 جنيها
![صورة أرشيفية](images/no.jpg)
دشن نشطاء مواقع التواصل الاجتماعي "فيس بوك وتويتر" هاشتاج "فاكر لما كان"، الذي تصدر تراند مصر على تويتر، واستغل النشطاء المصريون الهاشتاج لاستدعاء ذكريات الماضي لديهم، ومن أهمها رخص أسعار السلع، التي تضاعفت بشكل متزايد هذه الأيام.
ساندوتش بربع جنيه
قال خالد شعشاعي: "فاكر لما كان أجدع ساندوتش فول وطعمية بربع جنيه.. رايحة بينا على فين يا مصر".
وأضاف صلاح طابلة: "فاكر لما كان.. بنقف طوابير ع البنزينة بس كان التر بجنيه وبيترمي في الصحرا ومش ف حاجة غليت دلوقتي موجود سبحان الله اللتر وصل بـ3.65 وكل حاجة غليت".
وعلقت نجوى: "فاكر لما كان كنا بنهتف بنقول يا سوزان قولى للبيه كيلو العدس بـ 10 جنيه أهو العدس بقى بـ 26 جنيه".
ورد ميمو مروان: "فاكر لما كان الجنيه بلعب بيه بست بنج بونج و٥ محاولات اتارى طيارات".
وتابع ديد دارك مان: "فاكر لما كان.. كيس الشيبسى بنص جنيه".
كيلو اللحم
وقال أحمد السيد: "فاكر لما كان.. كيلو اللحمة بـ 60 جنيه ورغيف الحواوشي بتلاتة جنيه، وكيلو اللحمة بقا 130 جنيه ولسه الحواوشي بـ 3 جنيه، تحيه للرغيف الصامد يا جماعة".
وأضاف مون ياسو: "فاكر لما كان المندولين بربع جنيه".
وعلق هشام وصفي: "فاكر لما كان.. المصروف ربع جنيه بيجيب بيمبو وازازة كوكاكولا".
وتابع حسني مبارك: "فاكر لما كان كيس الشيبسي بـ 50 قرش ولتر البنزين بجنيه وتذكرة الأوتوبيس بـ 25 قرش والدولار بخمسة جنيه وعلبة المارلبورو بـ 4 جنيه بمشط الكبريت؟".
ورد ريالستيك: "فاكر لما كان كوباية عصير القصب بربع جنيه".
"مش راجعة"
وقالت أمنية صبري: "فاكر لما كان بتاخد الجنيه تحتار تجيب بيه أيه ولا أيه.. لك الله يا مصر".
وأضافت دعاء أمين: "فاكر لما كان.. كيس الشيبسى أفخم حاجة 1جنيه والبسكوووت الشمعدان 15 قرش راحت الأيام دى ومش راجعة تانى".
وعلق محمد أشرف: "من 15 سنة كانت امي تديني 6 جنيه. كنت أروح أجبلها بيهم فرخة وخضار. دلوقت 6 جنيه متجبش كيلو طماطم.. فاكر لما كان".
ورد كريم ماجد: "فاكر لما كان.. العيله كلها يقعدوا مع بعض قبل الموبايلات والسوشيال ويقعدوا يهزروا ويضحكوا ويلعبوا وفي السهرة نشغل مسرحية نشوفها كلنا".
وتابع محمود أحمد: "فاكر لما كان.. لتر البنزين باتنين جنيه والانبوبه بتمانية جنيه وكل حاجة رخيصة بس دا مش من زمان دا من أقل من أربع سنين".
وقالت عائشة عادل: "فاكر لما كان.. الدهب بـ45 جنيه".
وأضافت هيام العباس: "فاكر لما كان.. المصروف جنيه وكان بيجبلنا ازازة كوكاكولا وكيس شيبسي واتنين لوليتا؟ دلوقتي الجنيه مايجبش حق تذكرة المترو حتى".
وتابع محمود عيسى: "فاكر لما كان.. بيبقى في اكتر من 100000 متفرج في ستاد القاهرة بيدخلوا ويخرجوا من غير ما حد حتى يتخربش ومن غير الأمن ما يضايقهم".