سيدة تروي تجربتها مع قناديل البحر: لميتها وطبختها وأولادي اتخانقوا عليها
نشرت ربة منزل مصرية تدعى "منار" على حسابها على موقع التواصل الاجتماعي "فيس بوك" تجرِبتها مع قناديل البحر، والتي لجأت إلى جمعها وطهيها لتصبح وجبة لذيذة لها ولأبنائها بحسب ما ذكرته.
وكتبت السيدة: "لما جيت الشاطئ السنة دي لاقيت قناديل كتير أوي، وكأي ست مصرية قولت معقول كل القناديل دي هتترمي من غير فايدة، فقررت أدخل على النت وأشوف طريقة عمل وجبة من القناديل، أهو يبقى تغيير وتجرِبة جديدة".
وتابعت: "دخلت جبت وصفة من الهند ووصفة من هونج كونج واتضح أنها وجبة شعبية في شوارع الهند، بعت العيال اصطادولي شوية قناديل صابحة من على البلاج، وروحت البيت عملتها".
وشرحت "منار" طريقة الطهي: "القنديل عامل زي الطبق كده نازل منه شراشيب هي الرجلين، لبست جوانتي وشيلت الشراشيب دي كلها خالص بمعلقة ويتكحت لحد ميتبقى الطبق بس، مسكت الطبق نقعته في ميه وخل وليمون ربع ساعة، وبعدين عملت تتبيله السمك بتاعته، كمون وتوم وملح وزي مبتحبيها، قطعته جزل بس لازم تكون عريضة وكبيرة شوية لأنه بيكش في الزيت جدا، وتبلته في الدقيق والبقسماط زي السبيط بالضبط يتقلي لحد ما لونه يبقى ذهبيا، هيبقى مقرمش خااالص وطعمه أجمل من السبيط بجد".
واختتمت "منار" منشورها قائلة: "في الأول كانوا خايفين ياكلوه لحد ما جربوه وبعدين شوية بقوا يتخانقوا عليه، وعلى فكرة عجب الكلاب كمان خليكوا في القناديل الشفافة بلاش المنقطة لأني سمعت أنها ممكن تكون سامة، وكل سنة وإحنا والقناديل طيبين، ربنا ميقطعلهاش عادة وتزورنا كل سنة، على فكرة في الهند وهونج كونج بيعملوها كمان طواجن".
