شريف منير يحسم الجدل ويرد على منتقدي عرض «الزيبق» على جزءين
قرر الفنان شريف منير، الخروج عن صمته، والرد على منتقدي عرض مسلسل "الزيبق" على جزءين، وبخاصة أن ذلك تسبب في إثارة الجدل حول المسلسل؛ فهناك من رأى أن ذلك قرار صائب وهناك من رأى أنه لم يكن في حاجة لجزء ثان.
وحسم "شريف" الجدل، من خلال منشور عبر صفحته الشخصية على موقع التواصل الاجتماعي "فيس بوك"، جاء فيه: "أولًا: كل سنة وحضراتكم طيبين..في سؤال من صديق بيقول.. إن الدراما في مسلسل الزيبق أخدت حيّز كبير على حساب الأحداث المخابراتية في المسلسل.. وده كان ردّى.. حضرتك طرحت سؤال في أول الكلام.. على أي أساس قرر الإنتاج إن القصة تحتاج جزئين ؟؟.. أنا بقى عندى نفس السؤال لحضرتك.. على أي أساس حضرتك قررت إن القصة مش محتاجة جزئين ؟ هل حضرتك على علم بتفاصيل قصة الزيبق إللى الملخص بتاعها عند خمس أطراف فقط.. المخابرات العامة المصرية.. وائل عبدالله.. كريم عبد العزيز.. وليد يوسف.. والعبدلله..".
وأضاف: "عملية "الزيبق" اللي تفاصيلها أنا والأربع أطراف السالف ذكرهم عرفينها كويس.. من رابع المستحيلات تتلم في جزء واحد.. وده بسبب كثرة الأحداث وسخونتها.. وتم فعلًا نقاش بَينا على الجزء الدرامي.. فوجدنا بما إن العمل في كل الأحوال لازم يخرج على جزئين.. فيتعمل بالبلدي كده.. على نار هادية مايتسلقش".
وتابع: "أنا رأئيّ إن أي حد شايف إن الأحداث كان ممكن تتلم في تلاتين حلقة.. لازم يكون على علم بالقصة أولًا علشان يحكم صح.. وفى سبب مهم جدًا.. الناس مستعجلة تدخل في الأحداث على طول.. عايزين سسبنس ومخابرات بسرعة.. ونجيب من الآخر.. وده في اعتقادي حيفقد العمل عنصر التشويق المسلسل من أول لحظة معروف إنه على جزئين.. وكل حاجة كانت لازم تاخد حقها صح تمهيدًا للسخونة اللي إن شاء الله في الجزء التاني.. اللعب حيكون سخن جدًا.. تحياتي".
