كاتب شاب يجمع مميزات مسلسلات رمضان في تدوينة ساخرة
حرص أحد الكتاب الشباب يدعى "هشام منصور"، على جمع العلاقات الاجتماعية الإيجابية المتواجدة في مسلسلات رمضان من خلال تدوينة ساخرة، عبر صفحته الشخصية على موقع "فيس بوك".
وكتب "هشام"، في هذه التدوينة التي حظيت بإعجاب وتفاعل عدد كبير من الفنانين ومن بينهم الفنان أكرم حسني، قائلا: "من أهم الأحاسيس إللي حسيتها في رمضان ٢٠١٧ .. عايز نبيل الحلفاوي يبقي أبويا.. عايز أكرم حسني يبقي صاحبي ويقولي لي بالعكس يا هشام كل ما أعك.. عايز ياسر جلال يبقي في ضهري لو عندي مشكلة.. عايز إنچي المقدم تحبني وتستحملني.. عايز حنان مطاوع تبقي عشيقتي عشان صاحبة مزاج بصراحة وعايز زينة تخزوق أي بنت في حياتي عشان توفر على نص الخناقات".
وأضاف: "عايز جميلة عوض تسيبني في حالي عشان غالبا هتلبسني في الحيط.. عايز منة شلبي تقول يا مامود عادي حتى وانا اسمي هشام هبقى مبسوط برضه.. عايز ياسمين صبري (ده كلام ينطبق خارج سياق الدراما الرمضانية).. عايز باسل خياط ما أقابلوش صدفة حتى ولو دخلت قسم شرطة ألاقي أمير كرارة ولو اتحبست على جزيرة عايز ألاقي محمد سلام ولو عندي قضية يبقي القاضي شيكو".
وتابع: «عايز نيللي كريم تبقي سعيدة في حياتها بقي عشان أنا تعبتلها، دخلت السجن ٢٠١٤ أدمنت في ٢٠١٥، اتجننت ٢٠١٦، واتجوزت واحد خاين في ٢٠١٧، وخلاص الست هتقع مننا كدة والمسلسل اللي جاي غالبا هتبقى طالعة التلاتين حلقة في غيبوبة.. وأخيرا عايز كارمن بصيبص تبقى في حياتي بأي شكل من الأشكال، وطبعا عايز واحد بيفهم في الموبايلات ينزل لي فاير وول على تليفوني أو يفرمته».
