أحزان طلبة ثانوية عامة لصعوبة امتحان الإنجليزي.. كوكو شيري: ده لو إحنا كفار مكنوش هيعملوا فينا كده.. هدى: الامتحان في مستوى المدرس.. والجنجيهي: اللي حط الامتحان خد ثواب إفطار نصف مليون طالب

حالة من الغضب والحزن انتابت طلبة الثانوية العامة من نشطاء مواقع التواصل الاجتماعي "فيس بوك وتويتر" بسبب صعوبة امتحان اللغة الإنجليزية بالثانوية العامة، البعض أكد أن صعوبة الامتحان قد أودت بأحلامهم في الحصول على مجموع يؤهلهم للكلية التي يتمنونها، في حين طالب آخرون بإعادة الامتحان مرة أخرى.

في مستوى المدرس
قال إسلام طارق: "كنت داخل أقفل إنجليزي عشان يشيل العربي والالماني.. بس شكل كدا العربي والالماني هما اللي هيشيلو الإنجليزي.. ثانوية عامة".

وأضاف محمد إيهاب: "امتحان الإنجليزي طلع متوسط يعني هنلبس في الفيزياء".

وعلقت رباب: "من أيام الهكسوس لازم يجي امتحان الإنجليزي يعلم على الكل.. منهم لله".

وردت هدي كمال: "تقريبًا امتحان الإنجليزي جاي ف مستوى مُدرس المادة مش الطالب خالص".

وتابع مؤمن الحسيني: "الهوم كله بيقول أن امتحان الإنجليزي صعب إلا اختي بتقولي سهل!! أنا شاكك في البنت دي".

سؤال رامي
وقال على غزلان: "سؤال في امتحان الإنجليزي -عشرين عين شافوا الكتاب لما وقع، يبقي كام شخص شاف الكتاب؟.. ده جي يستظرف يا ماما".

وأضاف سلمي ناجي: "يعني ايه رامي يوقع الكتاب عايز ينقصنا ويضيع مجموعنا؟ طب أدي المجموع راح أهو.. أدينا نقصنا في الإنجليزي ارتحت يا رامي! امتحان الإنجليزي".

وعلق ناصر جر: "المشكلة الأكبر هنا إن لما امتحانات الإنجليزي والفرنساوي والعربي يبقي فيها لف ودوران وفوازير أومال الفيزيا والرياضة والكيميا هيبقي فيها إيه؟".

ورد محمد الجنجيهي: "اللي حط امتحان الإنجليزي خد ثواب إفطار نصف مليون طالب ثانوية عامة".

وتابعت سوكا: "ربنا ينتقم منه.. الواحد داخل على فيزيا وامتحان الإنجليزي قفل الواحد من كل حاجة".

سؤال رخم
وقالت آية هشام: "فيه تريكات بردو والله طلعت عنينا ربنا يسامحهم وفيه سؤال متكرر مرتين غباء يعنى.. امتحان الإنجليزي".

وأضاف أحمد سلامة: "الترجمة سهلة.. القطع صعبة جدًا ومحتاجة حد مركز جدًا.. الاختياري والفايند فيه تكات كتير.. القصة فيها سؤال رخم محتاج ذاكرة حديد.. المجمل رخم ومحتاج حد مذاكر أوي".

وعلقت يسرا: "امتحان الإنجليزي انهارده جاي وحش اوي انا قلبي واجعني اوي ورجعت سبع سنين ورا والله العظيم.. قمة الوجع أما تلاقي مستقبلك وفلوسك كله تحت الرجلين".

وردت آية النحاس: "حال دفعتي بعد امتحان الإنجليزي ال Timeline عندي عبارة عن طموحات متكسرة وأقسم بربي.. حسبي الله ونعم الوكيل".

وتابع أماني أحمد: "امتحان الإنجليزي النهارده كان ميكس ما بين الرياضة والفيزيا والمجاز والكناية والخيال واللا نهائية وما بعدها.. حسبي الله ونعم الوكيل".

وقال أرج أحمد: "ياريت أي حد اسمه رامي ميطلعش من بيتهم النهارده لأن لو حد في ثانوية شافه النهارده بعد امتحان الإنجليزي ممكن يفطر عليه".

وأضاف كوكو شيري: "امتحان الإنجليزي بالذمة ده امتحان طالب في ثانوية عامة.. ده لو احنا كفار مكنوش هيعملوا فينا كده.. الإنجليزي لازم يتعاد".